ევროპული საქართველოს ლიდერი, გიგა ბოკერია პუტინის რუსეთის მართვის მოდელს უწოდებს ირაკლი კობახიძის ინიციატივას, რომლის საფუძველზეც საარჩევნო რეგისტრაცია გაუუქმდება იმ პოლიტიკურ პარტიას, რომლის ლიდერიც კონსტიტუციურ ცენზს არ აკმაყოფილებს.

"რეჟიმი, სადაც მსხვილ ოპოზიციურ პარტიას, ჩვენ შემთხვევაში, იმ პოლიტიკურ პარტიას, რომელმაც ამ მანიპულირებული ციფრებითაც კი, ამ რეჟიმის ცესკოსი, მიიღო 27%, უუქმებენ რეგისტრაციას, ეს არის პუტინის რუსეთის მოდელი მართვის. ბოლომდე გასვლა ამ მოდელამდე. სწორედ პუტინის რუსეთში არის ეს მოდელი — რეგისტრაციიდან მოხსნა. ამ მეთოდს მიმართა პუტინის რუსეთმა არაერთხელ, პოლიტიკური კონკურენციის პირდაპირ შესაზღუდად", — განაცხადა გიგა ბოკერიამ.

ბოკერიას შეფასებით, ეს ინიციატივა პირდაპირ ნიშნავს, რომ მმართველ პარტიას სურს ავტორიტარული რეჟიმის დამყარება.

"ნერვებმა უმტყუნა მორიგ ჯერზე ივანიშვილს და ამის შედეგია ეს გულწრფელი განცხადებები, რაც მოვისმინეთ კობახიძისგან. სადაც პირდაპირ ითქვა, რაც ჩვენ კი ვიცით, მაგრამ, ასე ღიად ერიდებიან ხოლმე თქმას ივანიშვილის რეჟიმის წარმომადგენლები, რომ სურთ პოლიტიკური ავტორიტარული რეჟიმის დამყარება", — აცხადებს ბოკერია.

ქართული ოცნების აღმასრულებელმა მდივნმა, ირაკლი კობახიძემ, მმართველ პარტიის ოფისში დღეს გამართულ ბრიფინგზე განაცხადა, რომ ახალი მოწვევის პარლამენტში დაინიცირდება კანონპროექტი, რომლის საფუძველზეც საარჩევნო რეგისტრაცია გაუუქმდება იმ პოლიტიკურ პარტიას, რომლის ლიდერიც კონსტიტუციურ ცენზს არ აკმაყოფილებს.

მისი თქმით, საქართველოში პოლარიზაციის მთავარი წყარო მიხეილ სააკაშვილია, რომელიც არ აკმაყოფილებს ორ კონსტიტუციურ ცენზს — არ არის საქართველოს მოქალაქე და შეფარდებული აქვს თავისუფლების აღკვეთა, რაც აღსრულებას ექვემდებარება.

გაიგეთ მეტი: