სახელმწიფო სამხედრო სამეცნიერო-ტექნიკურ ცენტრ დელტას გადაყენებულმა დირექტორმა უჩა ძოძუაშვილმა 2030-ს განუცხადა, რომ მისთვის აბსურდულია ბრალდება, კახეთში, სეტყვის საწინააღმდეგო სისტემის გაუმართავობასთან დაკავშირებით. ძოძუაშვილის თქმით, მას ჯერ არ ჩაბარებია თავდაცვის მინისტრის განცხადება მისი გადაყენების შესახებ:

"ნებისმიერი ასეთი ტიპის გადაწყვეტილება, აპრიორი ვერ იქნება დამყარებული რეალურ ფაქტებზე. შესაბამისად, ჩემთვის აბსურდია. მე დარწმუნებული ვარ იმაში, რომ დელტას ვერანაირი ბრალეულობა ვერ დადგება ნებისმიერი იმ მიმართულებით, რაც ჟღერდება, გამორიცხულია ასეთი რაღაც. ბრალეულობა ნიშნავს, რომ რაღაც არ გაკეთდა. ჩვენ ყოველთვის ვაკეთებთ ყველაფერს. სისტემა არის დაყენებული კახეთში, სისტემის ყველა კომპონენტი არის გამართული. რაც შეეხება იმას, როგორ ვიმუშავეთ, ვიმუშავეთ ჩვენი შესაძლებლობებიდან მაქსიმალურზე. მე თინა ხიდაშელს არ ვეჩხუბები".

თავდაცვის სამინისტროში On.ge-ს განუცხადეს, რომ სამინისტროს გენერალური ინსპექცია სწავლობდა კახეთის რეგიონში სეტყვის საწინააღმდეგო საშუალებების გამოყენებასთან დაკავშირებით არსებული მდგომარეობას, რის შემდეგაც თავდაცვის მინისტრმა თინა ხიდაშელმა დელტას დირექტორის გადაყენების გადაწყვეტილება მიიღო. ჯერჯერობით, სამინისტროში არ აკონკრეტებენ, რა ტიპის დარღვევები გამოიკვეთა და კონკრეტულად რის გამო გაათავისუფლეს ძოძუაშვილი. სამინისტროს განცხადებით, ამის შესახებ ინფორმაციას, უახლოეს მომავალში გაავრცელებენ.

14 მაისს კახეთში მოსულმა სეტყვამ რამდენიმე სოფელში ვენახები და ხეხილის ბაღები მთლიანად გაანადგურა. როგორც ადგილობრივები აცხადებდნენ, დელტას სეტყვის საწინააღმდეგო სისტემამ ხარვეზებით იმუშავა, რის გამოც, ზარალის თავიდან აცილება ვერ მოხდა.