აშშ-ს არჩეული პრეზიდენტი, ჯო ბაიდენი ჯო ბაიდენი მიზნად ისახავს, რომ გაპრეზიდენტებიდან 100 დღის განმავლობაში ქვეყანაში კორონავირუსზე 100 მილიონი ვაქცინა გაკეთდეს. ამის შესახებ მან დელავერში ისაუბრა, სადაც ჯანდაცვის გუნდი წარადგინა.

პანდემიის დაწყების დღიდან აშშ-ში კორონავირუსის 15 მილიონზე მეტი შემთხვევა დაფიქსირდა და 285 ათასი ადამიანი გარდაიცვალა. როგორც შემთხვევათა რაოდენობის, ისე გარდაცვალების მაჩვენებლის მიხედვით, აშშ მსოფლიოში პირველ ადგილს იკავებს.

არჩეულმა პრეზიდენტმა, ჯო ბაიდენმა დელავერში ჯანდაცვის მინისტრად კალიფორნიის გენერალური პროკურორი, ხავიერ ბესერა წარადგინა. ხოლო დაავადებათა კონტროლისა და პრევენციის ცენტრის მომავალ ხელმძღვანელად როშელ ვალენსკი დაასახელა.

ბაიდენის თქმით, ოფისში ყოფნის პირველ თვეებში პანდემიის გავრცელება ვერ შეწყდება, თუმცა აღნიშნა, რომ კორონავირუსთან ბრძოლის სტრატეგია მნიშვნელოვნად შეიცვლება. გარდა ამისა, მან აღნიშნა, რომ პრიორიტეტი ბავშვების სკოლებში დაბრუნება იქნება.

აშშ-ს რეგულაციის ორგანოებმა 8 დეკემბერს დაადასტურეს, რომ Pfizer/BioNTech კოვიდ ვაქცინა 95 პროცენტით ეფექტურია, რაც მის დამტკიცებას გზას უხსნის. ამერიკის საკვებისა და წამლის ადმინისტრაცია საბოლოოდ გადაწყვეტილებას 10 დეკემბერს მიიღებს.

ამავე თემაზე: