მოქალაქეების ლიდერის, ალეკო ელისაშვილის თქმით, ოპოზიცია ლელოს ოფისში მესამე რაუნდზე სასაუბროდ შეიკრიბა. მისი განცხადებით, დღეს, განიხილავენ როგორ წარდგნენ შეხვედრაზე.

"მესამე რაუნდის სამზადისზე იქნება საუბარი — როგორ წავიდეთ, რითი წავიდეთ, რანაირად წავიდეთ. სხვადასხვა პარტიის ხალხი ვართ, წარმოიდგინეთ ისეთი ხალხი, რომელთაც ერთმანეთიც არ გვიყვარს დიდად და ბევრ საკითხში ერთმანეთს არ ვეთანხმებით, თუმცა ვნახოთ, აქამდე ვახერხებდით შეჯერებას საერთო პოზიციაზე, დღეს მოხერხდება თუ არა მერე გეტყვით", — განაცხადა მან.

ოპოზიციური პარტიების წარმომადგენლები დღეს ლელოს ოფისში კიდევ ერთხელ შეიკრიბნენ. არსებობს ინფორმაცია, რომ ოპოზიციის შეთავაზებებს შორის არის პლებისციტიც ხელახალი არჩევნების შესახებ.

31 ოქტომბერს გამართული საპარლამენტო არჩევნების შედეგებს ოპოზიცია არ აღიარებს. მათ უარი თქვეს მეორე ტურში მონაწილეობაზე და არ აპირებენ პარლამენტში შესვლას. პოლიტიკური კრიზისიდან გამოსავლის საპოვნელად აშშ-სა და ევროკავშირის ელჩების შუამავლობით მმართველი პარტიისა და ოპოზიცურ პარტიებს შორის მოლაპარაკებები მიმდინარეობს. ოპოზიცია მოითხოვს ჩატარდეს რიგგარეშე არჩევნები, გათავისუფლდნენ პოლიტპატიმრები და გადადგეს ცენტრალური საარჩევნო კომისიის თავმჯდომარე, თამარ ჟვანია. ქართულ ოცნებაში ამბობენ, რომ რიგგარეშე არჩევნების ჩატარების საკითხი არ განიხილება.