ინდუსტრიაში ერთ-ერთმა ყველაზე დიდმა და ცნობილმა კინოსტუდია Warner Bros.-მა დააანონსა, რომ თავისი ყველა ფილმი, რომელთა პრემიერაც 2021 წლის განმავლობაში უნდა შედგეს, კინოთეატრებსა და ონლაინ პლატფორმაზე ერთდროულად გამოვა.

ეს პლატფორმა HBO Max იქნება, რომელსაც WarnerMedia ფლობს. იმის გათვალისწინებით, ის ახალი სტრიმინგ სერვისია, როგორც ჩანს, მფლობელები აქტიურად ცდილობენ მომხმარებლების განსაკუთრებული გზით მოზიდვას: ამის მაგალითია თუნდაც ისიც, სერიალ ეიფორიის სპეციალური ეპიზოდი HBO Max-ზე რამდენიმე დღით ადრე გამოვიდა.

შესაბამისად, მაყურებლებს მომავალ წლის განმავლობაში ისეთი ბლოკბასტერების ხილვა, როგორებიცაა დიუნი თუ მატრიცა, კინოთეატრებში და სახლიდან გაუსვლელად ერთდროულად შეეძლებათ. ეს გადაწყვეტილება სულ 17 ფილმს შეეხება და აი, ისინიც.

უმნიშვნელო დეტალები (The Little Things), იუდა და შავი მესია (Judas and the Black Messiah), ტომი და ჯერი (Tom & Jerry), წყევლა: ეშმაკმა მაიძულა ამის გაკეთება (The Conjuring: The Devil Made Me Do It), მწვერვალზე (In The Heights), კოსმოსური შეჯიბრი: ახალი მემკვიდრეობა (Space Jam: A New Legacy), თვითმკვლელთა რაზმი (The Suicide Squad), მოგონებები (Reminiscence), ავსული (Malignant), დიუნი (Dune), ნიუიარკის წმინდანები (The Many Saints of Newark), მეფე რიჩარდი (King Richard), მტირალა მაჩო (Cry Macho) და მატრიცა 4 (Matrix 4).

აღსანიშნავია, რომ Warner Bros.-მა პირველად მსგავსი გადაწყვეტილება Wonder Woman 1984-ის პრემიერასთან დაკავშირებით მიიღო: ფილმი ონლაინ HBO Max-ის სტრიმინგ სერვისზე 25 დეკემბერს გამოვა და იმავე დღეს ის აშშ-ის კინოთეატრებშიც გაეშვება.

რამდენიმე კვირის წინ ამის გამო ექსპერტები ფიქრობდნენ, რომ ეს საცდელი გადაწყვეტილება იყო, რათა კინოსტუდიას ენახა, რამდენად მომგებიანი ნაბიჯი იქნებოდა ეს, თუმცა როგორც ჩანს, უფრო თამამი გადაწყვეტილების მიღებასაც არ მოერიდა და მომავალ წელს Warner Bros. ყველა კინოპრემიერას მსგავს ფორმატში განახორციელებს.