გირჩის ლიდერი იაგო ხვიჩია ამბობს, რომ მისი აწ უკვე ყოფილი თანაგუნდელის, ზურაბ გირჩი ჯაფარიძის განცხადება პარტიის დაშლის შესახებ დღეს დილით ნახა და "შოკში ჩავარდა". ხვიჩიას თქმით, ამ დროს "სულელური კომენტარი" დატოვა, რომლის გამოც მთელი დღეა ბოდიშებს იხდის.

"მიზეზი არ ვიცი, ეს ზურამ უნდა თქვას. მე შოკში ვიყავი დილას რომ წავიკითხე, რაღაც სულელური კომენტარი დავწერე და მთელი დღეა ბოდიშს ვიხდი ამის გამო, აი, ასეთ მდგომარეობაში გავიგე ეს ყვეალფერი", — განაცხადა მან.

ხვიჩიას თქმით, ჯაფარიძეს კონფლიქტი ჰქონდა ვახო მეგრელიშვილთან, მაგრამ არა მასთან და რაქვიაშვილთან, ამიტომ ეს ვერ იქნება პარტიის დაშლის მიზეზი.

"შეიძლება სასაცილოდ გამოიყურება, მაგრამ მართლა არ ვიცი რეალური მიზეზი ამ გადაწყვეტილების. შეიძლება გაბრაზება ჩათვალო, გავბრაზდი ვიღაცაზე, მაგრამ მას არაფერი კავშირი არ გააჩნია ჩვენს პოლიტიკიურ მსოფხედველობასთან",— განაცხადა მან.

დღეს, 4 დეკემბერს ცნობილი გახდა, რომ პარტია გირჩი გაიყო. ზურაბ ჯაფარიძის თქმით, იაგო ხვიჩიასთან, ვახტანგ მეგრელიშვილთან და ალექსანდრე რაქვიაშვილთან ერთად გირჩის კეთებას აღარ აპირებს. ამის შესახებ ჯაფარიძემ Facebook ჯგუფ გირჩის ბაბლში დაპოსტა, სადაც არ გაუვრცელებია დამატებითი განმარტებები იმის შესახებ, რა გახდა დაშლის მიზეზი.

ამ პოსტზე ხვიჩიამ დააკომენტარა, რომ "არასერიოზული სიგიჟეა", როცა "ატოცზე ტრაკის მჩვენებელი კაცი" წერს ამას და ახლა გაიგებდა ხალხი, რას უძლებდა ის წლების განმავლობაში. მოგვიანებით ხვიჩიამ ამ კომენტარის გამო ბოდიში მოიხადა.

რაც შეეხება პარტიის გაყოფას, ხვიჩია, მეგრელიშვილი და რაქვიაშვილი ამბობენ, რომ ჯაფარიძის განცხადება მოულოდნელი იყო. ხვიჩია ამბობს, რომ პარტიიდან წასვლას არ აპირებს, რაქვიაშვილის თქმით კი, არც გირჩი წარმოუდგენია ჯაფარიძის გარეშე და არც ის, რომ ზურა მათ გააგდებს.

მართალია, ჯაფარიძემ თავის პოსტში უარყო, თუმცა პარტიის გაყოფის სავარაუდო მიზეზად აიაგო ხვიჩიას პოსტი და მასზე გამოხმაურებები განიხილება. კერძოდ, რამდენიმე დღის წინ ხვიჩია იმ ადამიანის დაკავებას გამოეხმაურა, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მან Facebook-ზე დაწერა: "პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". სწორედ ამ პოსტს მოჰყვა მოქალაქეების, მათ შორის გირჩის მხარდამჭერების უკმაყოფილება და ხვიჩიას მიმართ კრიტიკა.

პარტიის ლიდერს ამ თემაზე განცხადება რამდენიმე დღის განმავლობაში არ გაუკეთებია. 3 დეკემბერს კი განაცხადა, რომ დროა, ზურაბ ჯაფარიძემ ხმა ამოიღოს, რადგან ხვიჩიას მლანძღველების სიაში მისი მეგობრები და დამფინანსებლებიც არიან. ამის შემდეგ ჯაფარიძემ განაცხადა, რომ მისი აზრით, ხვიჩიას განცხადება ბავშვთა პორნოგრაფიის საქმეზე არასწორი იყო, თუმცა არა შინაარსის, არამედ სხვა ფაქტორების გამო. თუმცა მას არ დაუზუსტებია, რას გულისხმობს სხვა ფაქტორებში. მანვე განმარტა, მისი აზრით, რა შემთხვევაში უნდა დაისაჯოს ადამიანი ბავშვთა პორნოგრაფიის ყურებისთვის და ამის რამდენიმე მაგალითი ჩამოთვალა.