გირჩის წარმომადგენლი იაგო ხვიჩია, სოციალურ ქსელში მის ლანძღვას ეხმაურება და ამბობს, რომ დროა გუნდის ლიდერმა ზურაბ ჯაფარიძემ ხმა ამოიღოს, რადგან ხვიჩიას მლანძღველების სიაში არიან ჯაფარიძის მეგობრებიც და დამფინანსებლებიც.

ხვიჩია განმარტავს და ამბობს, რომ უბრალოდ ლანძღავენ, ხოლო გულშემატკივრები, რომლებიც არ ლანძღავენ, მაგინებლებს თითქოს გულისტკივილით ეთანხმებიან რომ ეს არ უნდა გეთქვა. მისივე თქმით, ეს ყველაფერი ხდება ისე, რომ არავის აინტერესებს რეალურად შენ რა თქვი.

"დროა ჯაფარამ საკუთარი პოზიცია გამოხატოს, რადგან რასაც ვუყურებ ჩემი მლანძღველების ნაწილი მისი მეგობარი და დამფინანსებელია. უფრო გასაგებად რო ვთქვათ, გირჩში არის ხალხი, რომელიც ფიქრობს რომ გირჩი ერთკაციანი პარტიაა და ასეთად უნდა დარჩეს. ეს ხალხი გირჩში მხოლოდ ჯაფარას აღიარებს და დანარჩენს, სადაც შანსი აქვს ლანძღავს. ეს ხალხი შანსს არ უშვებს, რომ ჩასაფრებულის პოზიციიდან თავს დამესხას და არ დამკორტნოს", — განაცხადა ხვიჩიამ.

ხვიჩია ამბობს, რომ ის არ არის იდეალური ადამიანი, შეცდომებს უშვებს, ზოგჯერ გულსაც ტკენს ადამიანებს, როგორც წესი ამას აღიარებს და ცდილობს მეორეჯერ არ დაუშვას.

"ყველა ჩემი შეცდომა ნაღიარები მაქვს ვიღაცასთან და სადაც მოსახდელია იქ ბოდიშსაც ვიხდი. მაგრამ სადაც ბოდიში მოსახდელი არაა და იხდი ეგ არც ბოდიშია და არც არაფერს გამოასწორებს", — წერს ხვიჩია.

გირჩის წარმომადგენელი ხვიჩია, ასევე, სოციალურ ქსელში წერს, რომ მზად არის ნებისმიერ მედიასათან ისაუბროს ამ თემაზე და დისკუსია გამართოს.

"ჩემთვის ეს ტალახის კამპანია შანსია, საზოგადოებას ავუხსნა, როგორ ვუყურებ ადამიანს და მის თავისუფლებას. სინამდვილეში, ძალიან მარტივად არის საქმე, მე მჯერა, რომ არ შეიძლება ადამიანის ციხეში ჩასმა მიუხედავად იმისა, თუ რა ნახა და სხვას მოუყვა ამის შესახებ", — წერს ხვიჩია.

მისი თქმით, სინამდვილეში, ძალიან მარტივად არის საქმე, სჯერა, რომ არ შეიძლება ადამიანის ციხეში ჩასმა მიუხედავად იმისა, თუ რა ნახა და სხვას რა მოუყვა ამის შესახებ.

გირჩს ერთ-ერთი ლიდერის, იაგო ხვიჩიას კრიტიკა მისსავე განცხადებას მოჰყვა. ის ადამიანის დაკავებას გამოეხმაურა, რომელსაც ბრალად ედება წინასწარი შეცნობით არასრულწლოვნის გამოსახულების შემცველი პორნოგრაფიის შეძენა, შენახვა, ფლობა და სარგებლობა. მან ამ ამბავზე 29 ნოემბერს ფეისბუქზე პოსტი გამოაქვეყნა, სადაც წერდა "პორნო გადმოწერა, დაასეივა, ერთხელაც გადაწყვიტა ესარგებლა და დაიჭირეს? სულ გააფრინეს". სწორედ ამ პოსტს მოჰყვა მოქალაქეების, მათ შორის გირჩის მხარდამჭერების უკმაყოფილება და ხვიჩიას მიმართ კრიტიკა.