საქართველოს ბანკის მხარადაჭერით მსოფლიოში ერთ-ერთი ყველაზე მასშტაბური ტექნოლოგიური ღონისძიება Startup Grind ონლაინ გაიმართება.

Startup Grind მსოფლიოში ყველაზე დიდი, 3,5-მილიონი წევრისგან შემდგარი კომუნაა, რომელიც სტარტაპებსა და ინოვატორებს მთელი მსოფლიოს მასშტაბით აერთიანებს. წლის განმავლობაში Startup Grind-ის ორგანიზებით რამდენიმე საერთაშორისო ღონისძიება იმართება, მათ შორის უმსხვილესი — სილიკონ ველიზე, ლონდონსა და თბილისში.

Europe-Asia Connect წელს 100-ზე მეტ საერთაშორისო სპიკერს, 5000-ზე მეტ დამსწრეს და სტარტაპს 35-ზე მეტი ქვეყნიდან უმასპინძლებს. აღსანიშნავია, რომ სპიკერების უმრავლესობა ცნობილი კომპანიების დამფუძნებლები არიან, რომლებმაც ბიზნესი "ნულიდან" დაიწყეს და დღეისთვის ღირებული კომპანიები შექმნეს. მაგალითისთვის, ერთ-ერთი სპიკერი მარკეტინგის "გურუ", ანტრეპრენერი, ტექ-ევანგელისტი და არაერთი წიგნის ავტორი, გაი კავასაკია. ასევე სპიკერებს შორისაა Treasure Data-ს დამფუძნებელი — ბილ ტაი, კომპანია Oracle-ის ვიცე-პრეზიდენტი, ლუკ კოვალსკი.

ღონისძიების ერთ-ერთი მთავარი გამომსვლელი, სილიკონ ველის ანტრეპრენერი, სტივ ბლანკი იქნება. სტივ ბლანკის მრავალწლიანი გამოცდილება არაერთ ინოვაციურ კომპანიას და წარმატებულ პროექტს უკავშირდება. მას თანამედროვე ანტრეპრენერობის მამასაც უწოდებენ და განიხილავენ, როგორც ერთ-ერთ საუკეთესო მრჩეველს სტარტაპ ინდუსტრიაში.

Europe-Asia Connect არის უნიკალური შანსი სტარტაპებისთვის, მიიღონ მონაწილეობა მსოფლიოს წამყვანი ტექნოლოგიური კომპანიების დამფუძნებლების სემინარებში, გაიცნონ სხვა ქვეყნების სტარტაპები, გაცვალონ გამოცდილება და დაგეგმონ სამომავლო თანამშრომლობა. ასევე, მიიღონ ყველაზე დიდ სტარტაპ შეჯიბრში მონაწილეობა და გამარჯვების შემთხვევაში, ისარგებლონ სილიკონ ველის მენტორების რჩევებითაც.

პირველი მსგავსი ღონისძიება თბილისში — Europe-Asia Connect — 2019 წლის ნოემბერში ჩატარდა, სადაც სპიკერები 15 ქვეყნიდან იყვნენ მოწვეულნი. იქიდან გამომდინარე, რომ წლევანდელი ღონისძიება მთლიანად ონლაინ ფორმატში გაიმართება, ეს მასშტაბის კიდევ უფრო გაფართოების შესაძლებლობას იძლევა.

დამატებითი ინფორმაციის მისაღებად, შეგიძლიათ, ეწვიოთ ბმულს.

აღსანიშნავია, რომ საქართველოს ბანკის სტუდენტური ბარათით გადახდის შემთხვევაში სტუდენტებისთვის მოქმედებს სპეციალური ფასდაკლება. ამის შესახებ ინფორმაცია ხელმისაწვდომია ბმულზე.

ღონისძიება ტარდება საქართველოს ტექნოლოგიებისა და ინოვაციების სააგენტოსთან თანამშრომლობით და მას არაერთი ქართული და უცხოური პარტნიორი კომპანია ჰყავს.