თბილისის მერის, კახა კალაძის განცხადებით, წელს საახალწლო სოფელი არ მოეწყობა. ამის შესახებ მან დედაქალაქის მუნიციპალიტეტის მთავრობის სხდომაზე ისაუბრა.

"არსებული ეპიდემიოლოგიური მდგომარეობიდან გამომდინარე — ვიცით, რა მდგომარეობაა ქვეყანაში, მთელ მსოფლიოში, იმისთვის რომ გავუფრთხილდეთ ერთმანეთის უსაფრთხოებას, ერთმანეთის ჯანმრთელობას, გადაწყვეტილება მივიღეთ, რომ წელს საახალწლო სოფელი არ იქნება", — განაცხადა კახა კალაძემ.

კალაძის თქმით, საახალწლო სოფელი ქმნის მიზიდულობის ცენტრს, სადაც ბევრი ადამიანი იყრის თავს, მათ შორის, ბავშვები და მოხუცებიც და გაჭირდებოდა კონტროლი. მისივე თქმით, უხერხული იქნებოდა, ვინმესთვის ეთქვათ, რომ ხალხმრავლობის გამო არ შესულიყვნენ საახალწლო სოფელში.