ინფექციონისტ თენგიზ ცერცვაძის განცხადებით, ქვეყნის ხელმძღანელობის, ჯანდაცვის სისტემისა და Covid-19-თან ბრძოლაში აქტიურად ჩაბმული ექიმების უსაფუძვლო კრიტიკა, იგივეა ომის დროს საკუთარ სახლში ბუხართან მოკალათებულმა პიროვნებამ ფრონტის წინა ხაზზე მებრძოლ ჯარისკაცებს თოფის დაჭერა და საბრძოლო ტაქტიკა ასწავლო. ინფექციური საავადმყოფოს დირექტორი და კლინიკური ჯგუფის ხელმძღვანელის თქმით, მთელი კოვიდპანდემიის განმავლობაში, მაგრამ განსაკუთრებით ბოლო პერიოდში ცალკეული ექიმები, რომლებიც ერთხელაც არ ყოფილან კოვიდ კლინიკაში და არცერთი სერიოზული კოვიდ ავადმყოფი თვალით არ უნახავთ, კრიტიკულ პოსტებს გაუთავებლად აქვეყნებენ.

"ეს იგივეა, ომის დროს საკუთარ სახლში ბუხართან მოკალათებულმა პიროვნებამ ფრონტის წინა ხაზზე მებრძოლ ჯარისკაცებს თოფის დაჭერა და საბრძოლო ტაქტიკა ასწავლოს. ცნობილმა ექიმმა ბატონმა, გიორგი კანდელაკმა ამ დღეებში ფეისბუქზე გამოაქვეყნა პოსტი სახელწოდებით ქართული რეალობიდან, სადაც ბოროტი წითელარმიელი ბრიყვული გამომეტყველებით დაჟინებით სვამს კითხვას "შენ გაისინჯე დღეს შენი დედიმერი?" პოსტს თან ახლავს ბ-ნი გიორგის რამოდენიმე ანგაჟირებული თანამოაზრის ირონიულ/ცინიკური კომენტარი და ღლიცინი D-დიმერის გამოკვლევის საჭიროების თემაზე. მინდა გარკვევით ვუთხრა ბ-ნ გიორგის, მის თანამოაზრეებს (კიდევ კარგი ძალიან ცოტანი არიან) და მთელ მოსახლეობას, რომ D-დიმერი, ზოგიერთ სხვა მარკერთან (კოაგულოგრამა, თრომბოციტების რაოდენობა და სხვ.) ერთად წარმოადგენს კოვიდ პაციენტებში თრომბოზის და თრომბოემბოლიური გართულების რისკის შეფასების, დიაგნოსტიკის, პრევენციისა და კლინიკური მართვის უმნიშვნელოვანეს მაჩვენებელს", — აცხადებს ცერცვაძე.

მისივე თქმით, მსოფლიოს ყველა წამყვან ქვეყანაში (საქართველოს ჩათვლით) და ყველა კლინიკაში სისხლში D-დიმერის განსაზღვრა უტარდება უკლებლივ ყველა ჰოსპიტალიზებულ კოვიდ პაციენტს, აგრეთვე, ჰოსპიტალს გარეთ დარჩენილ იმ პაციენტებს, ვისაც თრომბოზის და თრომბოემბოლიზმის მომატებული რისკი აღენიშნება. ცერცვაძის აზრით, კანდელაკის ცილისწამება არაკომპეტენტურობისა და არაკორექტულობის ფარგლებს სცდება და დანაშაულის ნიშნებს შეიცავს.

"რამეთუ იწვევს მოსახლეობაში ნიჰილიზმს, უნდობლობას ექიმების და ოფიციალური სტრუქტურების მიმართ და ბევრ მათგანს (ვინც უარს იტყვის აღნიშნულ გამოკვლევაზე) პოტენციურად სასიკვდილოდ წირავს. ბატონმა გიორგიმ ან მართლა არ იცის კოვიდ პაციენტებში ამ გამოკვლევის მნიშვნელობა, ან შესანიშნავად იცის, მაგრამ მოქმედებს პრინციპით "რაც უარესი, მით უკეთესი", — ამბობს ის.

ცერცვაძის თქმით, საქართველოში Covid-19-ით ავადმყოფების მკურნალობის კლინიკური მართვის მაღალი ხარისხის დადასტურებაა ის ფაქტი, რომ დღევანდელ პირობებშიც კი ქვეყანას ევროპისა და ამერიკის ქვეყნებს შორის სიკვდილობის ერთ-ერთი ყველაზე დაბალი პროცენტული მაჩვენებელი (0,92%) აქვს.