ბელარუსის დედაქალაქ მინსკის სხვადასხვა ნაწილში მოქალაქეები საპროტესტი აქციაზე ისევ შეიკრიბნენ. TUT.BY-ს ცნობით, პროტესტი ძალოვნების მხრიდან დაკავებების ფონზე მიმდინარეობს. თვითმხილველები ცრელმსადენი გაზის გამოყენების შემთხვევებზეც საუბრობენ. დემონსტრანტები გარეთ ქვეყნის სხვა ქალაქშიც გამოვიდნენ. უფლებადამცველი ორგანიზაცია ვიასნას ინფორმაციით, 15:00 საათის მონაცემებით, ქვეყნის მასშტაბით აქციის 70 მონაწილეა დაკავებული.

დემონსტრანტების მოთხოვნები 113-ე დღეა უცვლელია:

  • ალექსანდრე ლუკაშენკოს პრეზიდენტის თანამდებობიდან გადადგომა;
  • პოლიტპატიმრების გათავისუფლება;
  • პოლიციური ძალადობის შეწყვეტა.

ბელარუსში საპროტესტო აქციები 9 აგვისტოს ჩატარებული საპრეზიდენტო არჩევნების შედეგების გამოცხადებისთანავე დაიწყო და დღემდე გრძელდება. მოსახლეობა არჩევნების შედეგებს არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.

6 ნოემბერს ევროკავშირმა 15 ბელარუს მაღალჩინოსანს, მათ შორის პრეზიდენტ ალექსანდრ ლუკაშენკოს წინააღმდეგ სანქციები აამოქმედა. სანქციები მოიცავს ევროკავშირის ტერიტორიაზე მოგზაურობის შეზღუდვას და საბანკო ანგარიშების გაყინვას.