დღეს, თბილისში, დაახლოებით 1 საათის წინ ქალთა მარში დაიწყო. მსვლელობის მიზანია სამართლიანობის და თანასწორობის მხარდაჭერა.

"მარში სოლიდარობას უცხადებს ყველა ქალსა და მამაკაცს, მიუხედავად მათი სქესის, რელიგიის, ასაკისა და შესაძლებლობებისა. მარშის საშუალებით მისი მონაწილეები ასევე მხარდაჭერას უცხადებენ იმიგრანტებს, განსხვავებული კანის ფერის ადამიანებსა და მათ, ვინც საკუთარ იდენტიფიცირებას ახდენს, როგორც LGBTQIA," - აღნიშნულია აქციის ორგანიზატორების მიერ გავრცელებულ განცხადებაში.

აქციის ორგანიზატორების ინფორმაციით, აშშ-ის პრეზიდენტის ინაუგურაციის მეორე დღეს ქალაქები მსოფლიოს მასშტაბით ერთიანდებიან მათ მხარდასაჭერად, ვინც ყველაზე მეტად ზიანდება სიძულვილის, არატოლერანტულობისა და ძალადობის ტირაჟირებით.

აქცია თბილისში ვაშინგტონში ქალთა მარშისა და მსოფლიოს 370 ქალაქში დაგეგმილი ქალთა მარშების მიმართ სოლიდარობის გამოხატვის მიზნით შეიკრიბა.

თბილისში აქციის მონაწილეები დაახლოებით 1 საათის წინ ფილარმონიის საკონცერტო დარბაზის მიმდებარე ტერიტორიაზე შეიკრიბნენ და პარლამენტის შენობისკენ გაემართნენ, 15 საათზე კი აქციის დაწყებაა დაგეგმილი.