თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, ამ ეტაპზე კლინიკას არცერთი რეანიმაციული პაციენტის მიღების საშუალება არ აქვს, რადგან არ არსებობს საწოლფონდი.

"ამ ეტაპზე ჩვენი კლინიკა თავიდან ბოლომდე ემსახურება კოვიდპაციენტებს და სამწუხაროდ ინტენსიურ თერაპიაში და რეანიმაციულ განყოფილებაში მათთვის ადგილი ვერ იძებნება. პირველი საუნივერსიტეტო კლინიკის ლიმიტი, ამ ეტაპზე შემიძლია, გითხრათ სრული პასუხისმგებლობით, ლევან რატიანის ოჯახის წევრებსაც რომ დასჭირდეთ რეანიმაცია, სამწუხაროდ, ლევან რატიანი მათ ვერ მიიღებს — ეს არის დღევანდელი ამ კლინიკის რეალობა", — განაცხადა ლევან რატიანმა.

რატიანის თქმით, დაავადებულ ადამიანთა რიცხვის მატება გულისხმობს, რომ დაახლოებით, 20 პროცენტს ჰოსპიტალიზაცია სჭირდება, რისი საშუალებაც კლინიკას აღარ აქვს.

23 ნოემბერს ლევან რატიანმა ფორმულას ეთერში განაცხადა, თავიდანვე ამბობდა, რომ ქვეყანაში არსებული საავადმყოფოების საწოლფონდების მინიმუმ 80 პროცენტი კოვიდთან ბრძოლისთვის უნდა გამოეყენებინათ.

"ყველამ უნდა დაივიწყოს ამბიცია, რაც კი რამე გააჩნია. ვისაც არ შეუძლია, სახლში წავიდეს და ის მოვიდეს, ვისაც შეუძლია ეს პროცესი მართოს", — განაცხადა ლევან რატიანამ ფორმულას ეთერში განაცხადა. პოლიტიკის ფორმულის წამყვანმა, სოფო ზურაბიანმა მას რამდენჯერმე ჰკითხა, ხომ არ გულისხმობდა ის ჯანდაცვის მინისტრ, ეკატერინე ტიკარაძეს, თუმცა რატიანმა ამ კითხვას პირდაპირ არ უპასუხა.

"ვინც არ უნდა იყოს, საჯარო მოხელე იქნება თუ გლეხი, ყველა იქითკენ უნდა ვიყოთ მიმართული, რომ რაც შეიძლება მეტი სიცოცხლე გადავარჩინოთ. ძალიან მტკივა გული, რომ პაციენტებს, რომელთაც სჭირდებათ დახმარება, მას ექიმები ვერ ეხმარებიან, ამიტომ ყველამ უნდა დაივიწყოს ამბიცია, რაც კი რამე გააჩნია. ვისაც არ შეუძლია, სახლში წავიდეს და ის მოვიდეს, ვისაც შეუძლია ეს პროცესი მართოს", — განაცხადა რატიანმა.

ამავე თემაზე:

ქვეყანაში 7000-მდე საწოლია მობილიზებული — ტიკარაძე