პარლამენტის ვიცე-სპიკერის, გია ვოლსკის განცხადებით, არჩევნებში ქსრთული ოცნების გამარჯვება არაერთი ფაქტორითაა განპირობებული, მათ შორის "სადისტური მმართველობის სისტემის დამარცხება" საგანგებოდ მნიშვნელოვანია.

"ძვირფასო მეგობრებო, არჩევნებში ჩვენი ერთობლივი გამარჯვება არაერთი ფაქტორითაა განპირობებული. მათ შორის საგანგებოდ მნიშვნელოვანია სადისტური მმართველობის სისტემის დამარცხება, სოციალური პაკეტის გაზრდა და ათასობით სიცოცხლის გადარჩენა, მრავალი საშინაო და საგარეო საფრთხეების მიუხედავად სტაბილურობის შენარჩუნება და მყარი პოზიციების დამკვიდრება საერთაშორისო ასპარეზზე, მასშტაბური ინფრასტრუქტურული პროექტების განხორციელება, წარმოებების და ფერმერული მეურნეობების განვითარების სახელმწიფო უზრუნველყოფა, ახალი სამუშაო ადგილების შექმნა და სიღარიბის მაჩვენებლის შემცირება", — დაწერა ვოლსკიმ ფეისბუქგვერდზე.

ვოლსკის თქმით, დღევანდელი საქართველო მსოფლიო რეიტინგების ყველა მაჩვენებლით მოწინავე პოზიციებზეა.

"დღევანდელი საქართველო მსოფლიო რეიტინგების ყველა მაჩვენებლით მოწინავე პოზიციებზეა. ჩვენი სამომავლო პროგრამა ყველა ამ მიმართულების ახალი ძალით განვითარებას გულისხმობს! შემცირების მიუხედავად, მემკვიდრეობით მიღებული სოციალური პრობლემები კვლავ მძიმე ტვირთად გვაწევს! ამასთანავე არათუ ჩვენი სამშობლო, არამედ მსოფლიო დგას არაერთი ახალი გამოწვევის წინაშე", — აცხადებს პარლამენტის ვიცე-სპიკერი.

გია ვოლსკის განცხადებით, არჩევნები ყველა კომპეტენტურმა საერთაშორისო ინსტიტუტმა აღიარა და ამან "დესტრუქციული პოლიტიკური ძალების" აგრესია კიდევ უფრო გაამძაფრა.

21 ნოემბერს საქართველოში საპარლამენტო არჩევნების მეორე ტური გაიმართა, სადაც ქართული ოცნების 17-ივე მაჟორიტარი დეპუტატობის კანდიდატმა გაიმარჯვა. ოპოზიციამ მეორე ტურში მონაწილეობაზე უარი თქვა. ისინი ხელახალ არჩევნებს ითხოვენ, თუმცა მმართველი გუნდი აცხადებს, რომ ისინი ამას არც განიხილავენ.

არჩევნების დღეს ოპოზიცია აქციის ჩატარებას გეგმავდა, თუმცა საბოლოოდ მათ გადაწყვიტეს, რომ საპროტესტო ღონისძიებები არ ჩაეტარებინათ და სრული იგნორი გამოეცხადებინათ.