საპარლამენტო არჩევნების მეორე ტურში, რომელშიც ოპოზიცია არ მონაწილეობს, "გამარჯვების ბოლომდე მისაყვანად" ირაკლი კობახიძე ამომრჩეველს აქტივობისკენ მოუწოდებს. პარლამენტის ყოფილმა თავმჯდომარემ და ქართული ოცნების აღმასრულებელმა მდივანმა ეს განცხადება საარჩევნო უბანთან, ხმის მიცემის შემდეგ გააკეთა.

"დღეს არის მნიშვნელოვანი დღე, როდესაც ბოლომდე უნდა იქნას მიყვანილი ის გამარჯვება, რომელსაც მხარი დაუჭირა საქართველოს მილიონამდე მოქალაქემ. რა თქმა უნდა, მოვუწოდებთ ამომრჩეველს მაღალი აქტივობისკენ, ისეთივე აქტივობისკენ, როგორიც გამოვლინდა არჩევნების პირველ ტურში. აქტივობა ლოგიკურია, რომ უფრო დაბალია, ვიდრე იყო პირველი ტურის დროს. აქედან გამომდინარე, ჩვენი თხოვნა და მოწოდებაა ამომრჩევლისკენ, რომ მაქსიმალურად იაქტიურონ დღევანდელ დღესაც, იმისათვის, რომ მაქსიმალური შედეგი დაფიქსირდეს, რაც ძალიან მნიშვნელოვანია გამარჯვების ბოლომდე მისაყვანად", — განაცხადა კობახიძემ.

მისივე თქმით, დღეს "სათანადო არჩევანი" გააკეთა, "როგორიც სჭირდება ჩვენი ქვეყნის შემდგომ განვითარებას".

კობახიძეს ჟურნალისტებმა ჰკითხეს ოპოზიციის ბოიკოტის შესახებაც. მისი თქმით, ეს არასწორი ნაბიჯია და "მათ არ სურთ დამარცხების მიღება".

"როგორც ამერიკელები იტყოდნენ, ეს კინო ნანახი გვაქვს. 2016 წელსაც იყო ზუსტად იგივე ვითარება, 2016 წელსაც უარი თქვეს ოპოზიციის წარმომადგენლებმა მეორე ტურში მონაწილეობაზე, რაც არ არის სწორი ნაბიჯი, პირდაპირ შეიძლება ითქვა. მათ არ სურთ მეორე დამარცხების მიღება და ამის გაფორმება, აქედან გამომდინარე, ისინი თავს იკავებენ მეორე ტურებში მონაწილეობისგან ზედიზედ მეორე არჩევნებია. ეს არ არის ის ნაბიჯი, რომლითაც პოლიტიკაში უნდა იმოქმედო", — თქვა კობახიძემ.