ადვოკატის თქმით, მიკროსაფინანსო ორგანიზაციაზე თავდასხმაში ბრალდებულს ყუმბარის ფორმის სანთებელა ჰქონდა. ამის შესახებ მან ჟურნალისტებს დაკავებულთან გასაუბრების შემდეგ განუცხადა.

"როგორც თვითონ ახსნა სანთებელა ჰქონდა. ეს იყო ყუმბარის ფორმის სანთებელა", — განაცხადა ადვოკატმა.

20 ნოემბერს ერთი პირი წერეთლის გამზირზე მიკროსაფინანსო ორგანიზაცია MBC-ში შეიჭრა და მძევლები აიყვანა. შსს-ში აცხადებენ, რომ მას 17 ადამიანი ჰყავდა მძევლად.

რამდენიმესაათიანი სპეცოპერაციის შემდეგ ყველა მძევალი გათავისუფლდა, ხოლო თავდამსხმელი დააკავეს.

შენობიდან კადრები ინტერნეტში მალევე გავრცელდა. სავარაუდო თავდამსხმელი მძევლებს ეუბნება, რომ პირდაპირი ეთერი ჩართონ, რათა მედიებმა კადრები ნახონ და გააშუქონ. ის მოითხოვდა, რომ პარლამენტის დეპუტატები და ამ არჩევნებში მონაწილე პოლიტიკოსები შეკრებილიყვნენ და 3 კანონი მიეღოთ: აზარტული თამაშების აკრძალვა, სესხის პროცენტად მაქსიმუმ 7%-ის განსაზღვრა და წამლების ფასის შემცირება. გავრცელებულ კადრებში ის არ ასახელებს, რა შემთხვევაში გაათავისუფლებდა მძევლებს და არც მომლაპარაკებელს ითხოვდა.

გამოძიება ორზე მეტი პირის მძევლად ხელში ჩაგდებისა და ცეცხლსასროლი იარაღის მართლსაწინააღმდეგო შენახვა-ტარების მუხლებით მიმდინარეობს.