პანდემიის პირობებში თბილისის მერია გეგმავს, რომ საახალწლო ილუმინაციებზე 600 ათას ლარზე მეტი დახარჯოს. გარდა ამისა, იგეგმება საახალწლო სოფლის მოწყობაც.

როგორც თბილისის მერმა, კახა კალაძემ იმედის ეთერში ისაუბრა, "კორონავირუსს ახალი წელი არ მოუკლას" და მას ბევრი ბავშვი და ახალგაზრდა ელოდება.

"ჩვენ ყველაფერს გავაკეთებთ, რომ ეს მნიშვნელოვანი დღესასწაული შედგეს. ქალაქი წელსაც მოირთვება, იქნება მოკრძალებული. შეიძლება, ისე ვერ გავაკეთოთ, როგორც წინა წლებში, მაგრამ გპირდებით, რომ მართლა ლამაზი იქნებ", — განაცხადა მან.

რაც შეეხება საახალწლო სოფელს, მერი ამბობს, რომ არსებული ეპიდემიოლოგიური მდგომარეობიდან გამომდინარე ამაზე მოგვიანებით ისაუბრებს.

კახა კალაძის თქმითვე, ილუმინაციებზე გათვალისწინებული 600 ათასი ლარიდან ძირითადი ნაწილი დამატებითი ილუმუნაციების შესყიდვაზე დაიხარჯება. როგორც მან, განმარტა დემონტაჟის დროს ილუმინაციების ზიანდება და მათი განახლება აუცილებელია.

"სრული პასუხისმგებლობით ვამბობ, რომ ერთადერთი მიმართულება, რომელსაც პანდემიის პირობებში თანხები არ მოგვიკლია, ეს არის ჯანდაცვა და სოციალური მიმართულებები", — განმარტა კალაძემ.

ილუმინაციებისა და საახალწლო სოფლის გარდა თბილისის მერია დაახლოებით 200 ათასი ლარს შარშან ნაყიდი ნაძვის ხის გადაკეთებისთვის დახარჯავს.

ნაძვის ხის გასაფორმებლად თავდაპირველად მერიამ ტენდერი გამოაცხადა, რომელიც ჩაიშალა და ამჯერად დამატებით აქსესუარებს გამარტივებული შესყიდვის გზით შეიძენენ. დოკუმენტიდან ირკვევა, რომ მორთვა-გაფორმებაში 103 850 ლარი დაიხარჯება, 70 ცალ ნათურასა და 21 მეტრი სიგრძის გირლიანდაში — 70 950, სტრინგი კაბელის შეძენა კი ბიუჯეტს 21 ათასი ლარი დაუჯდება.