მოქალაქეების ლიდერი, ალეკო ელისაშვილი აცხადებს, რომ მისი პარტიის ნებისმიერი წევრი მზადაა, დაუჯდეს ქართული ოცნების აღმასრულებელ მდივანს, ირაკლი კობახიძეს დებატებში. ამის შესახებ ინფორმაცია ელისაშვილმა facebook გვერდზე გაავრცელა.

"რამდენიმე წელიწადია ოცნება უარს ამბობს დებატებზე. არჩევნების წინაც კი გაექცნენ დებატებს. ეხლა გაყოყოჩებულა კობახიძე და აბდუშაჰილივით დოინჯშემოყრილი დადის თურმე - დამიჯდნენ დებატებშიო. აგერ ვართ ჩვენი პარტია - მოქალაქეები და ნებისმიერი ჩვენგანი მზადაა დაუჯდეს კობახიძეს და აჩვენოს რა გაყალბდა და როგორ", — წერს ელისაშვილი.

ქართული ოცნების აღმასრულებელმა მდივანმა, ირაკლი კობახიძემ ოპოზიციას სატელევიზიო დებატები გუშინ შესთავაზა. მან რუსთავი 2-ის ეთერში განაცხადა, რომ მზადაა ისეთ ფორმატში მონაწილეობისთვის, სადაც ოპოზიციას დაუპირისპირდება მმართველი გუნდი, კონკრეტული განსახილველი თემები კი იქნება საარჩევნო დარღვევები, ხარვეზები და მანიპულაცია.