მრავალი ათწლეულის განმავლობაში NASA თვითმფრინავების ჰაერის ნაკადის გამოსახულებების შესაქმნელად კომპიუტერულ მოდელებს იყენებდა.

NASA-ს ეიმის კვლევითმა ცენტრმა, რომელიც კალიფორნიაში, სილიკონის ველზე მდებარეობს, აღნიშნული მეთოდი გამოიყენა დრონის პატარა მოდელის, DJI Phantom 3 quadcopter-ის აეროდინამიკის შესასწავლად.

აღნიშნული მოდელი ჰაერში ასაწევად საჭირო ბიძგების მისაღებად ოთხ მბრუნავ როტორს ეყრდნობა, რომელთა დახმარებითაც ის ჰაერის მასებს უმკლავდება და ფრენას იწყებს.

ამ ანიმაციაში ჰაერის ნაკადის ურთიერთქმედება ტალღოვანი ხაზებითაა ნაჩვენები, წნევის ცვლილება კი - ფერადი ხაზებით. მაღალი წნევის მასები წითლად არის ნაჩვენები, ხოლო დაბალი წნევისა - ლურჯად.

დრონის აეროდინამიურობის გამოკვლევის მიზანი მისი შესაძლებლობების უკეთესად გამოყენებაა. მაგალითისთვის, დრონის გამოყენება მიწოდების ინდუსტრიაშიც იგეგმება და მას მომავლის ფოსტალიონად მოიაზრებენ. ცხადია, რაც უფრო დეტალურად და კარგად ვიცნობთ ტექნოლოგიის მუშაობის პრინციპს, მით უფრო მარტივია მისი გაუმჯობესება. სწორედ ამიტომ, NASA მნიშვნელოვნად მიიჩნევს მფრინავი ობიექტების შესწავლას.