სტრატეგია აღმაშენებლის ლიდერის, გიორგი ვაშაძის თქმთ, ოპოზიციას მოლოდინი აქვს, რომ მმართველ გუნდთან შემდეგ შეხვედრაზე არჩევნების თარიღს განიხილავენ. როგორც იგი ამბობს, ხელახალი არჩევნების ჩატარება გადამწყვეტი საკითხია.

"ჩვენ შევჯერდით, რომ აუცილებლად იქნება შეხვედრის შემდეგი რაუნდი, სადაც კონკრეტულად ვისაუბრებთ უკვე არჩევნების თარიღზე, ჩვენ ოპოზიციას ეს მოლოდინი გვაქვს, რომ არჩევნების თარიღზე ვისაუბრეთ, რადგან ვთქვით, რომ ამის გარეშე სხვა საკითხების განხილვას აზრი არ აქვს", — განაცხადა გიორგი ვაშაძემ.

აშშ-ს ელჩის რეზიდენციაში შეხვედრის შემდეგ პარტია მოქალაქეების ლიდერმა, ალეკო ელისაშვილმა განაცხადა, რომ პარლამენტში თავმჯდომარე არჩილ თალაკვაძე მისული იყო წინადადებით, რომელიც მათთვის მიუღებელია. თუმცა რა შეთავაზებაზე იყო საუბარი, ელისაშილი არ ამბობს.

დღეს, 14 ნოემბერს ოპოზიციასა და მმართველ გუნდს შორის მოლაპარაკებების მეორე რაუნდი გაიმართა. შეხვედრა კვლავ აშშ-ს ელჩის, კელი დეგნანის რეზიდენციაში ჩატარდა და მას ევროკავშირის ელჩი, კარლ ჰარცელიც დაესწრო. პირველი შეხვედრის მსგავსად, ახლაც მოლაპარაკებებში ბარიერგადალახული ოპოზიციური პარტიის ლიდერები და პარლამენტის თავმჯდომარე, არჩილ თალაკვაძე ჩაერთნენ.

ოპოზიცია 31 ოქტომბერს ჩატარებული არჩევნების შედეგებს არ აღიარებს. მათ საპარლამენტო მანდატებზე უარი უკვე თქვეს. ხელახალი არჩევნების მოთხოვნით, ოპოზიციის წარმომადგენლები საპროტესტო აქციებს მართავენ. მომდევნო აქცია რუსთაველის გამზირზე14 ნოემბერსაა დაგეგმილი.

ამავე თემაზე: