ფინანსთა მინისტრის, ივანე მაჭავარიანის თქმით, ბევრია ისეთი შეძლებული ოჯახი, რომელსაც კომუნალური გადასახადების სუბსიდირების პროგრამით სარგებლობა არ სჭირდება და მაგალითად საკუთარი დედა მოიყვანა.

"აი, მაგალითს გეტყვით, შეძლებული ოჯახის მშობელს, აი, დედაჩემს, მაგალითად, მოხმარების კუთხით ერგებოდა და თვითონ უარს ამბობს. ბევრმა თქვა უარი, შესაძლებლობა არის", — განაცხადა ივანე მაჭავარიანმა.

როგორც მაჭავარიანმა აღნიშნა, 2021 წლის ბიუჯეტში კომუნალური გადასახადების სუბსიდირების პროგრამა გაგრძელდება. მანვე აღნიშნა, რომ შესაძლოა, 100 პროცენტიანი მიზნობრიობა დაცული არ იყოს, როგორც საკუთარ მაგალითზე აღნიშნა, მაგრამ არის ოჯახები, რომელთაც სჭირდებათ, ამიტომ ნოემბრიდან 4 თვის განმავლობაში ისარგებლებენ კომუნალური გადასახადის შეღავათით.

პრემიერმინისტრ გიორგი გახარიას განცხადებით, კომუნალური დახმარების პროგრამა ნოემბრიდან ამოქმედდება, ხოლო მათ, ვისაც ეს დახმარება არ სჭირდებათ, განცხადების საფუძველზე უარის თქმა შეუძლიათ.

"მთავრობის ანტიკრიზისული მხარდაჭერის გეგმის მესამე ტალღა მოიცავს როგორც ბიზნესის, ასევე, სოციალურ მხარდაჭერას. ეს ნიშნავს კომუნალურების გადახდას, რომელიც 1 ნოემბრიდან იწყება და იქნება 4 თვის განმავლობაში", — განაცხადა გიორგი გახარიამ.

მისი თქმით, ეს შეღავათი შეეხება იმ ოჯახებს, რომელთაც ექნებათ მოხმარებული 200 კილოვატამდე ენერგია და 200 კუბურ მეტრამდე გაზი. ასევე, წყალი და დასუფთავება.

პრემიერმინისტრმა აღნიშნა, რომ მოქალაქეს უარის თქმა საკუთარი განცხადების საფუძველზე შეუძლია, თუმცა, არ აუხსნია, მსურველებმა რა ფორმით და ვის უნდა მიმართონ.