ერთიანი ნაციონალური მოძრაობის ყოფილი წევრი, გიგი უგულავა მიიჩნევს, რომ მთავრობის მიერ ეროვნულ ბანკთან ერთად შემუშავებული ლარიზაციის გეგმა არაფერს შეცვლის. მისივე თქმით, ხელისუფლებამ ინვესტორებს უფრო კომფორტულ გარემო უნდა შეუქმნას, მათ შორის კი ლარის დოლარით ჩანაცვლების გზით. ამის შესახებ უგულავამ რუსთავი 2-ის გადაცემა არჩევანში სტუმრობისას ისაუბრა:

"ახლა ლარიზაციის გეგმა მიდის. ეს ლარიზაციის გეგმა არის დაღუპვა. ეს ვერაფერს ვერ მოიტანს. დოლარის რყევას ებრძოლოს საქართველოს ეკონომიკა. ერთადერთი, რაც სიტუაციას გამოასწორებს ეს არის მეტი ინვესტიციის მოზიდვა. ინვესტორს კომფორტი რომ შეუქმნა ეს ლარის პრობლემა უნდა მოუხსნა. საერთოდ გლობალიზაცია მიდის, ეს ბანკნოტების თემა, ელექტრონული ბანკნოტები შემოდის, საერთოდ ფული აღარ არის არც ეროვნული სიამაყე, რა ეროვნული სიამაყეა ლარი?! 20 წლის წინანდელი პროდუქტია. მთლიანად ტრანსფორმაცია მიდის ამ სფეროში. შესაბამისად, ეს ნელ-ნელა უნდა საერთოდ უნდა მოიხსნას და იყოს მიმოქცევაში დოლარი. ყველანი დოლარით აზროვნებენ. რამეს თუ ყიდულობ დოლარით ფიქრობ, მანქანა იქნება, სახლი იქნება, თუ ტელევიზორი იქნება ყველა დოლარში ფიქრობს, ყველაფერი დოლარში არის. ეს არის მთავრობის ხელში მანიპულაციის ინსტრუმენტი."

უგულავა კრედიტების გაძვირებასაც პროგნოზირებს:

"პატარა ნაწილი ისარგებლებს იმ რაღაც საჩუქრით, დანარჩენი ნაწილი ვერაფრით ვერ ისარგებლებს. გაძვირდება კრედიტები იმიტომ, რომ იმ ბანკს, კრედიტს რომ გასცემს ლარში, იმას დოლარით აქვს აღებული კრედიტი. ანუ იმან ეს ყველაფერი უნდა დაფაროს. ეს ხომ ორჯერ ორი ოთხია?!"