მუსიკოს მიხაილო თოდუას განცხადებით, სასამართლოს გადაწყვეტილებას, რომლის მიხედვითაც შინაპატიმრობის ვადა გაეზარდა, გაასაჩივრებს. თავდაპირველად, პრობაციის ბიურო მიხაილოს თავისუფლების აღკვეთას ითხოვდა, თუმცა, როგორც მუსიკოსი ამბობს, სასამართლო პროცესზე უწყებამ მეორე მოთხოვნა — შინაპატიმრობის ვადის გაზრდა დააყენა.

"სასამართლომ, ამ ორიდან რომელიმე აირჩიეთო. ჩვენ არც ერთი არ ავირჩიეთ, რა თქმა უნდა და სასამართლომ გადაწყვიტა, ცოტათი დამსაჯოს და კიდევ ორი საათი მომაკლო იმ 12 საათიდან. არც განხილულა წესიერად, ისევე ბუნდოვნად დარჩა, როგორც იყო. ვაპირებთ, გავასაჩივოთ და იმედია, მერე მაინც ვიპოვი სამართალს, თუ არა და, გავა ეს წელიწადი და ათი თვე და დამანებებენ თავს", — განაცხადა მიხაილო თოდუამ სასამართლო სხდომის შემდეგ.

დღეს სასამართლომ არ დააკმაყოფილა მიხაილო თოდუას ციხეში დაბრუნების მოთხოვნა, თუმცა მას დღის განმავლობაში გარეთ ყოფნის დრო 2 საათით შეუზღუდა.

გუშინ, 10 ნოემბერს, ცნობილი გახდა, რომ პრობაციის სამსახურმა მუსიკოს მიხაილო თოდუას ციხეში დაბრუნებას მოითხოვა. მუსიკოსის თქმით, მას საპატიოდ 13-14 და 17 ოქტომბრის ღონისძიებები არ ჩაუთვალეს — 17 ოქტომბერს მან გირჩის პარტიულ ღონისძიებაზე, ღამის ათი საათის შემდეგ დაუკრა.

მუსიკოსი მიხეილ თოდუა (მიხაილო) 2013 წლის სექტემბერში 12 გრამი MDMA-სთვის დააკავეს და 9-წლიანი პატიმრობა მიუსაჯეს. მას საპროცესო შეთანხმება შესთავაზეს, თუმცა, 20 ათასი ლარის არქონის გამო სასჯელს საპატიმროში იხდიდა. საბოლოოდ, თოდუამ საპატიმრო დაწესებულება 2019 წელს დატოვა, ხოლო დარჩენილი ვადა შინაპატიმრობით შეეცვალა.

შინაპატიმრობის პირობებში ის ვალდებულია, ატაროს ელექტროსამაჯური და საღამოს 9 საათის შემდეგ სახლიდან არ გავიდეს. ღონისძიებებზე დაკვრის შემთხვევაში კი პრობაციის სამსახურს უნდა მიმართოს.

გაიგე მეტი: