რესპუბლიკური პარტიის ყოფილი ლიდერი დავით უსუფაშვილი დიანა ტრაპაიძის გადაცემაში სტუმრობისას აცხადებს, რომ ის პოლიტიკურ შვებულებაშია.

პარლამენტის ყოფილი თავჯდომარე დასძენს, რომ ის აქტიურ პოლიტიკაში დაბრუნდება:

"დიახ, არიან ადამიანები, რომლებსაც სურთ ჩემი ხილვა აქტიურ პოლიტიკაში და მათ მივმართავ და ვეტყვი, რომ მე დავბრუნდები აქტიურ პოლიტიკაში. თუმცა, არიან ადამიანები, რომლებსაც აღარ სურთ ჩემი ხილვა აქტიურ პოლიტიკაში, მათაც იგივეს ვეტყვი".

მისი თქმით, ის სერიოზულ ადამიანებთან ერთად, სერიოზულ საქმეების გაკეთებას გეგმავს და სწორედ ამას ეძღვნება მისი შვებულება. უსუფაშვილი აცხადებს, რომ ყველა პოლიტიკოსს უყვარს, როცა მას ოპონირებენ, თუმცა მისი თქმით, ბიძინა ივანიშვილთან ოპონირება ცარიელ სივრცესთან ოპონირებას ჰგავს, რადგან ის პროცესებში მაშინ ერთვება, როცა ამას თვლის საჭიროდ.

უსუფაშვილი მიიჩნევს, რომ პოლიტიკური ოპონირება უნდა წარიმართოს იმ ადამიანებისადმი, რომლებსაც კონკრეტული ვალდებულებები აქვთ აღებული:

"არიან კონკრეტული ადამიანები, რომლებიც პასუხს აგებენ კონკრეტულ საკითხებზე, ქალაქში, სოფლად, რაიონში, შიდა პოლიტიკაში, საგარეო პოლიტიკაში, მათ არ უნდა ჰქონდეთ პრივილეგია, რომ ყველა დარტყმა თუ ყველა კითხვა მიდის ივანიშვილისკენ".

უსუფაშვილის თქმით, აქტიურ პოლიტიკაში დაბრუნების შემდეგ მას და მის გუნდს არ ექნებათ ერთადერთობის პრეტენზია.