კინომოყვარულები კარგად იცნობენ იმ ფილმებს, რომელთა ყურებაც საშობაოდ თუ წინასაახალწლო პერიოდში განსაკუთრებულად სასიამოვნოა — მათი სადღესასწაულო ატმოსფერო ჩვენს განწყობაზეც სასიამოვნოდ აისახება. თუმცა ასეთ ფილმებს შორის ცოტა თუ გაგახსენდებათ ისეთი, რომელიც LGBTQ ადამიანების ისტორიასაც მოგვითხრობს.

სწორედ ამ დანაკლისის შევსებას ეცდება სტრიმინგ სერვისი ჰულუ კინოსტუდია Sony Pictures-თან ერთად: მათ ერთად შექმნეს ახალი კინოსურათი Happiest Season (წლის უბედნიერესი დრო), რომელშიც მთავარ როლს კრისტენ სტიუარტი ასრულებს.

ცოტა ხნის წინ გავრცელებული ფილმის პირველი ტრეილერი ნამდვილად სახალისო სანახაობას გვპირდება:

ფილმის სცენარის მიხედვით, კრისტენ სტიუარტი მთავარი გმირის, ების როლს ასრულებს, რომელიც საშობაოდ თავისი შეყვარებულის, ჰარპერის ოჯახთან სტუმრად მიდის, თუმცა მხოლოდ ცოტა ხნით ადრე გაიგებს, რომ ჰარპერის ოჯახის წევრებმა მათი ურთიერთობისა და სექსუალური ორიენტაციის შესახებ არაფერი იციან. სწორედ აქედან იწყება ერთდროულად სახალისო და სევდიანი მოვლენები: რეალური იდენტობის დამალვა ხშირად კომიკურ სახეს იძენს, თუმცა ამავდროულად წყვილს შორის ურთიერთობას უსაფუძვლო დაძაბულობას მატებს.

კრისტენ სტიუარტს მაყურებლების უმეტესობა ბინდის ფილმების სერიაში შესრულებული როლით იცნობს, თუმცა ბოლო წლებში მან სხვა არაერთი საინტერესო პერსონაჟიც განასახიერა ეკრანზე, მათ შორის ქვიარ ქალები ფილმებში The Runaways, Lizzie და JT Leroy.

აღსანიშნავია, რომ ეს 30 წლის ამერიკელი მსახიობი ჩილელ რეჟისორ პაბლო ლარაინის მომავალ ფილმში პრინცესა დაიანას როლსაც მოირგებს.

მანამდე კი, ისღა დაგვრჩენია, 25 ნოემბერს ამ ახალი რომანტიკული კომედიის წლის უბედნიერესი დრო პრემიერას დაველოდოთ და სტიუარტის სამსახიობო შესრულება შევაფასოთ.

თუ გინდათ, მსგავს სიახლეებს მიადევნოთ თვალი და ზოგადად, კინოხელოვნება თქვენი საყვარელი სადისკუსიო თემაა, შემოგვიერთდით ფილმების ჯგუფში.