საქართველოს ექსპრეზიდენტი და ამჟამად უკრაინის ერთ-ერთი ოპოზიციური პარტიის ლიდერი მიხეილ სააკაშვილი რუსთავი 2-ის ეთერში იმ მიზეზებზე საუბრობს, რის გამოც ნაციონალური მოძრაობა მისმა ნაწილმა დატოვა:

"ნაციონალური მოძრაობის იდეა იყო ქართული თანამედროვე სახელმწიფოებრიობა. არის განსხვავება ჩემს და ჩემი ხალხს ხედვასა და მათ [პარტიიდან გასული ნაწილის] ხედვას შორის.

ჩვენ გვქონდა კონცეპტუალური დავები, ისინი ატარებდნენ გამოკითხვებს, "აი ამ გამოკითხვაში ხალხს უნდა ამის მოსმენა, ხალხისთვის პოპულარულია ეს თემები, პროგრამა ისე უნდა ჩამოვაყალიბოთ, რომ ხალხი არ გავაღიზიანოთ სხვა რაღაცებზე ლაპარაკით", მე 2012 წელსაც ვერ მოვასწარი პროგრამის შედგენაში ჩარევა, იმდენად დაკავებული ვიყავი დიდი პროექტების დასრულებით.

მე სრულიად სხვანაირად ვფიქრობ, კი არ უნდა მიჩანჩალებდე პროცესების უკან, კი არ უნდა მიყვებოდე დინებას, დინებას მიყვებიან მკვდარი თევზები. შენ უნდა იყო მზად დინების საწინააღმდეგოდ ცურვაში. შეიძლება დინება იცვლებოდეს, მაგრამ შენი მიმართულება არ უნდა იცვლებოდეს".