აშშ-ის არჩეულმა პრეზიდენტმა, ჯო ბაიდენმა მოქმედი პრეზიდენტისა და მისი კონკურენტის, დონალდ ტრამპის ამომრჩევლებსაც მიმართა და მათ ერთობისა და შერიგებისკენ მოუწოდა.

"მესმის ამ საღამოს თქვენი იმედგაცრუება. ერთი-ორჯერ მეც დავმარცხებულვარ, მაგრამ ახლა, მოდი, მივცეთ ერთმანეთს შანსი.

ვფიცავ, რომ ვიქნები პრეზიდენტი, რომელიც ცდილობს არა დაყოს, არამედ გააერთიანოს, რომელიც ვერ ხედავს ცისფერ და წითელ შტატებს, არამედ ხედავს გაერთიანებულ შტატებს", — განაცხადა მან ერისადმი პირველ მიმართვაში.

ბაიდენმა აღნიშნა, რომ ორივე მხარემ უნდა მოუსმინოს ერთმანეთს.

"მოვიდა დრო უარი ვთქვათ უხეშ რიტორიკაზე, დავაგდოთ ტემპერატურა, ისევ დავინახოთ ერთმანეთი, ისევ მოვუსმინოთ ერთმანეთს და პროგრესის მისაღწევად, უნდა შევეშვათ ჩვენს მოწინააღმდეგეებთან ისე მოქცევას, როგორც მტრებთან. ისინი ჩვენი მტრები არ არიან, ისინი ამერიკელები არიან", — განაცხადა ბაიდენმა.

წინასწარი მონაცემებით, ჯო ბაიდენი აშშ-ის 46-ე პრეზიდენტი გახდა, კამალა ჰარისი კი აშშ-ის ისტორიაში პირველი ვიცე-პრეზიდენტი ქალია. ბაიდენს გამარჯვება მიულოცა არაერთმა მსოფლიო ლიდერმა და ის არჩეულ პრეზიდენტად მოიხსენია, ამის ფონზე ტრამპი თავს გამარჯვებულად მიიჩნევს და შედეგებს არ აღიარებს.

დონალდ ტრამპი გახდა პირველი პრეზიდენტი 1992 წლის შემდეგ, რომელიც ამერიკელმა ხალხმა ხელმეორედ აღარ აირჩია.

გაიგეთ მეტი ჯო ბაიდენზე: