ნაციონალური მოძრაობის მაჟორიტარობის კანდიდატმა, ხატია დეკანოიძემ განაცხადა, რომ ქართული ოცნების საარჩევნო შტაბის ხელმძღვანელის, ირაკლი კობახიძის განცხადებები "სევდანარევ მხიარულებას" იწვევს და მას "მასხარა" უწოდა. ასე გამოეხმაურა ის კობახიძის ბრალდებებს რევოლუციურ სცენარზე.

მისი თქმით, კობახიძის ნათქვამს "ოცნების" დიდი ნაწილიც აღარ აღიქვამს სერიოზულად და ის "ბოდავს". რაც შეეხება სუს-ში გამოკითხვას, დეკანოიძე ამ ფაქტს ტრაგიკომედიას უწოდებს.

"ჯერ სუს-მა ათქმევინა, წავიდა სუს-ში, დაიბარეს ვითომ. ეს ხომ დადგმული სპექტაკლია და ამას არაფერი რეალობასთან არ აქვს საერთო", — განაცხადა მან.

ქართული ოცნების აღმასრულებელი მდივნის, ირაკლი კობახიძის განცხადებით, ე.წ. რევოლუციური სცენარის შესახებ გამოკითხვისას სახელმწიფო უსაფრთხოების სამსახურს ინფორმაცია მიაწოდა. სუს-ის შენობიდან გამოსვლის შემდეგ, მან ჟურნალისტებთან განაცხადა, რომ გამოძიებას დაუსახელა ინფორმაციის წყარო და მიხეილ სააკაშვილის ე.წ. "რევოლუციური სცენარის" შინაარსი. კობახიძე ამბობს, რომ ლიდერების გვარებიც დაასახელა.

"რა თქმა უნდა, ეს ყველაფერი მიეკუთვნება იმ სცენარს, რომელიც არის შედგენილი მიხეილ სააკაშვილის მიერ, რომელიც არის ლიდერი ამ მთავარი კრიმინალური დესტრუქციული ძალის და მასთან ერთად ამ კუთხით მოქმედებდნენ, ასევე, რამდენიმე წარმომადგენელი ამ პარტიის, რომელთაგან დავასახელებდი, მაგალითად, დევი ჭანკოტაძეს, დიმიტრი შაშკინს, იყვნენ სხვებიც ჩართული ამ სცენარის განხორციელებაში. რა თქმა უნდა, ამით უნდა დაინტერესებულიყო გამოძიება და დღეს ამასთან დაკავშირებით შედგა გამოკითხვა", — განაცხადა კობახიძემ.

მისივე თქმით, მას სუს-იდან იმ ინფორმაციასთან დაკავშირებით დაუკავშირდნენ, რომელიც მან რამდენიმე დღის წინ გაავრცელა. საუბარია ბრიფინგზე, რომელიც ე.წ. რევოლუციური სცენარის ფარგლებში ნაციონალური მოძრაობის ლიდერებისა და აქტივისტების სამზადისს ეხებოდა.

კობახიძემ მაშინ თქვა, რომ შექმნილი იყო ჯგუფები, მათ შორის ყოფილი ძალოვნებისგან შემდგარი, რომლებსაც გარკვეული ტიპის შეიარაღება ჰქონდათ. კობახიძიძის თქმით, შეიარაღებული ადამიანები არჩევნების დღესაც გამოჩნდნენ. ის, ასევე, ამბობს, რომ მათ თან ჰქონდათ ელექტროშოკები და ა.შ.