შემოდგომის სუსხი შემოგვეპარა, დღეები დამოკლდა, ტემპერატურა დაეცა და ცხოვრების ტემპიც შენელდა. ერთი შეხედვით იდეალური დროა სახლში გასატარებლად, ან აივანზე მოსაკალათებლად, პლედის მოსახურად, ნისლიანი ქალაქის საყურებლად და ცხელი ჩაის დასალევად. თუმცა ყველაზე ლამაზი სეზონის სახლში გატარება არც ისე სწორი არჩევანია.

ფერადი ფოთლებისა და ნაირფერი ბუნების სანახავად ის ადგილები შეგირჩიე, სადაც ხალხმრავლობას გაექცევი და ოქროსფერი ფოთოლცვენის მომსწრე გახდები.

საბადურის ტყე

ფოტო: Nino Mazanishvili

საბადურის ტყე მსოფლიოს ულამაზესი ტყეების სიაშია, თუმცა თბილისიდან 20 კილომეტრში მდებარე ზღაპრული ადგილის მონახულებას ამის გარეშეც არ ინანებდი. ოქროსფერი ფოთლებით დათოვლილი ტყე აუცილებლად მოგწყვეტს რეალობას. მონიშნე ონლაინ რუკაზე ადგილი, წასახემსებლად კონტეინერები გამოავსე, თერმოსში ცხელი კაკაო ჩაასხი, შექმენი ტკბილი ნოემბრის შესაფერისი ფლეილისტი და საბადურის ტყისკენ გაეშურე.

ბატეთის ტბა

ფოტო: Shermazana

ქარელში მდებარე ბატეთის ტბა ზაფხულის ნოსტალგიას წამიერად გაგიქრობს და როგორც არ უნდა გენატრებოდეს ცხელი დღეები, ამ ადგილის ნახვის შემდეგ აუცილებლად იტყვი, რომ შემოდგომა ყველაზე ლამაზი სეზონია.

შაორის ტბა, რაჭა

ფოტო: ირაკლი შავგულიძე

შაორი სულიერ სიმშვიდეს მოგგვრის და ეს განცდა დიდი ხნის განმავლობაში გაგყვება. ამასთან ერთად, შემოდგომაზე წყალსაცავი ნაირფერ ხეებს ირეკლავს და აქ საუცხოო სურათებსაც გადაიღებ.

ბორჯომი

ფოტო: Trip Finder

თუ ბორჯომს ესტუმრები შემოდგომის ზღაპრული ფერები აუცილებლად დაგატყვევებს. ის ამ დროს შეუდარებელია და ბუნებაში არსებული ყველა ფერითაა წარმოდგენილი.

ბორჯომის პარკი ის ჯადოსნური ადგილია, სადაც სიმშვიდეს მხოლოდ ოქროსფერი ფოთლების შარიშური თუ დაგირღვევს, ან შეიძლება ანცი ციყვი შემოგეფეთოს. უკვდავების წყაროს წყალსაც დააგემოვნებ და მერე შეგიძლია პატარა ტაძრისკენაც გააგრძელო გზა. ამ ადგილას ისე აივსები სიხარულით, პოლიტიკა, ცოტა ხნით მაინც, სულ დაგავიწყდება.

რკონი

ფოტო: გიორგი ედიშერაშვილი / flickr

თუ გინდა, რომ ოქროს შემოდგომის დღეები ვირტუალურად კი არა, არამედ ცოცხლად შეიგრძნო, მაშინ თეძამის ხეობას უნდა ესტუმრო და ყური მიუგდო ბუნებისა და რკონის დუეტს. მერე თამარის ხიდზეც გადაირბინე და სურვილები ჩაიფიქრე.

აუცილებლად დაამატე საბადურის, ბატეთის, შაორის, ბორჯომისა და რკონის დღეები შენს კალენდარს. მერწმუნე, წინ დაუვიწყარი თავგადასავალი გელის.