ევროპარლამენტარი ანა ფოტიგა ციხეში გიორგი რურუაზე თავდასხმის გამო შეშფოთებას გამოთქვამს. მისი თქმით, ევროკავშირის დიპლომატებმა იგი ციხეში უნდა მოინახულონ და სიტუაცია შეაფასონ.

"უკიდურესად შეშფოთებული ვარ ციხეში გიორგი რურუას ცემისა და მასზე თავდასხმის გამო. საქართველოს მთავრობა მის ჯანმრთელობასა და უსაფრთხოებაზე სრულ პასუხისმგებლობას ატარებს. მოვუწოდებ ჯოზეფ ბორელსა და ევროკავშირის საგარეო საქმეთა სამსახურს, ეს საკითხი დააყენონ. ევროკავშირის დიპლომატებმა რურუა უნდა მოინახულონ და სიტუაცია შეაფასონ", — წერს ფოტიგა ტვიტერზე.

გუშინ, 2 ნოემბერს გიორგი რურუაზე ციხეში თავდასხმა განხორციელდა, ამის შესახებ ინფორმაცია ერთიანი ნაციონალური მოძრაობის წევრმა, სალომე სამადაშვილმა, ფორმულას ეთერში გაავრცელა. როგორც სპეციალურ პენიტენციურ სამსახურში განაცხადეს, ინცინდენტზე გამოძიება უკვე დაწყებულია.

მათივე განცხადებით, გიორგი რურუა ადვოკატთან ვიზიტის მიზნით გამოყვანილი იყო საკნიდან, რა დროსაც მას თავს დაესხნენ და ფიზიკური და სიტყვიერი შეურაცხყოფა მიაყენეს, რაზეც, გამოძიება უკვე დაწყებულია.