თურქეთში მძლავრი მიწისძვრის შემდეგ 4 წლის გოგო 91-საათიანი ძებნის შემდეგ ნანგრევებში ცოცხალი იპოვეს. Al Jazeera-ს ინფორმაციით, ამის შესახებ ქალაქ იზმირის მერმა განაცხადა.

"ჩვენ 91-ე საათზე სასწაულის მომსწრეები გავხდით. მაშველებმა ოთხი წლის აიდა დაიხსნეს", — განაცხადა იზმირის მერმა, ტუნკ სოიერმა.

როგორც მაშველმა ჟურნალისტებს უთხრა, მას ბავშვის ყვირილი ესმოდა, შემდეგ კი ისჭურჭლის სარეცხი მანქანის გვერდით აღმოაჩინეს. მისივე თქმით, აიდამ მას ხელი დაუქნია და საკუთარი სახელიც უთხრა.

წინა კვირაში ეგეოსის ზღვაში შვიდბალიანი მიწისძვრის შედეგად 102 ადამიანი გარდაიცვალა, ხოლო 994 დაშავდა. თურქეთში დროებითი თავშესაფრებისთვის 3 500 კარავია გაშლილი.

ყველაზე მეტად დაზარალდნენ ქალაქები ბაირაკლი და იზმირი. ორშაბათს იზმირში მრავალსაათიანი ძებნის შემდეგ 3 და 14 წლის გოგოები იპოვეს. ორივე მათგანმა მიწისძვრის შედეგად ოჯახის წევრები დაკარგა.

განმეორებითი ბიძგების საშიშროების გამო ათასობით ადამიანი კარვებში ათენებს ღამეს.