ვენის ცენტრალურ ნაწილში, სინაგოგაზე თავდასხმის შედეგად, სულ მცირე, 4 მშვიდობიანი მოქალაქე დაიღუპა. ამასთან ლიკვიდირებულია ერთი თავდამსხმელი. ინფორმაციას ამის შესახებ Reuters ავრცელებს.

ავსტრიის შინაგან საქმეთა მინისტრმა, კარლ ნეჰამერმა აღნიშნული ტერორისტულ აქტად შეაფასა და მოსახლეობას სახლში დარჩენისაკენ მოუწოდა. მისი თქმით, შესაძლებელია, რომ თავდასხმაში მონაწილეთა რიცხვი გაიზარდოს. პოლიცია საგამოძიებო მოქმედებებს ამ დრომდე ატარებს.

"გუშინ საღამოს მინიმუმ ერთი ისლამისტი ტერორისტი დაგვესხა თავს. ავსტრია ბოლო 75 წლის მანძილზე ძლიერი დემოკრატიის ქვეყანა იყო, ქვეყანა, რომლის იდენტურობა გამოირჩევა კანონის უზენაესობით, გამოხატვის თავისუფლებით, აგრეთვე, ტოლერანტობით. გუშინდელი შემთხვევა იყო თავდასხმა ამ ღირებულებებზე", — განაცხადა მან.

ბოლო ინფორმაციით, დაშავებულია, სულ მცირე, 15 ადამიანი, რომელთა შორისაა ერთი პოლიციის ოფიცერი. ამათგან, 7 დაშავებულის მდგომარეობა კრიტიკულად მძიმეა.

ტერორისტულ აქტად შეფასებული თავდასხმა ავსტრიაში, გუშინ 2 ნოემბერს მოხდა. ავსტრიაში კორონავირუსის შემთხვევების მატების გამო დღეს ე.წ. ლოქდაუნი ამოქმედდა. კარანტინის გამოცხადებამდე ერთი დღით ადრე კი, ქალაქში ხალხმრავლობა იყო. სწორედ ამ დროს, საღამოს 8 საათისკენ 6 სხვადასხვა ლოკაციაზე დაიწყო თავდასხმა და რამდენიმე ადამიანის სიცოცხლე იმსხვერპლა.