ლელოს წევრის, ფიქრია ჩიხრაძის თქმით, 31 ჩატარდა არჩევნები სახელწოდებით სპეცოპერაცია. ამის შესახებ მან TV პირველის ეთერში ისაუბრა.

"ეს არჩევნები ჩვეულებრივი არჩევნები კი არ იყო, არამედ, აღმოჩნდა არჩევნები, სახელწოდებით სპეცოპერაცია, რომელიც დაიწყო არჩევნებამდე კარგა ხნით ადრე, რადგან ადმინისტრაციული რესურსი, დაშინებები, მოსყიდვა, კრიმინალური ელემენტების ჩართულობა იყო ძალიან ჭარბად წინასაარჩევნო პერიოდში", — განაცხადა მან.

საპარლამენტო არჩევნები საქართველოში 31 ოქტომბერს ჩატარდა. პარლამენტის არჩევნები წელს პირველად პროპორციულთან მიახლოებული, 120/30-ზე სისტემით გაიმართა. ცესკოს გამოცხადებულ შედეგებს ოპოზიცია არ აღიარებს და პერმანენტულად აქციებს გეგმავს. პარტიების ნაწილი ამბობს, რომ სადეპუტატო მანდატებზე უარს იტყვიან, რათა რიგგარეშე არჩევნები ჩატარდეს.

ახალი საარჩევნო სისტემით, პარლამენტში პროპორციული სიისთვის 120 მანდატია გათვალისწინებული. ცესკოს ახლანდელი მონაცემებით, ეს მანდატები პარტიების მოპოვებული ხმების მიხედვით ასე უნდა გადანაწილებულიყო:

  • ქართული ოცნება — 48,15% — 61 მანდატი;
  • ნაციონალური მოძრაობა და ძალა ერთობაშია — 27,14% — 35 მანდატი;
  • ევროპული საქართველო — 3,78% — 5 მანდატი;
  • ლელო — 3,15% — 4 მანდატი;
  • სტრატეგია აღმაშენებელი — 3,15% — 4 მანდატი;
  • პატრიოტთა ალიანსი — 3,15% — 4 მანდატი;
  • გირჩი — 2, 89% — 4 მანდატი;
  • მოქალაქეები — 1,33% — 2 მანდატი;
  • ლეიბორისტული პარტია — 1% — 1 მანდატი.