საბავშვო სიმღერამ Baby Shark, რომელსაც, ალბათ, ყველა კარგად იცნობს, ვის ოჯახში, სამეგობროში, სამეზობლოსა თუ სანათესაოში ერთი ბავშვი მაინც მოიძებნება, YouTube-ზე ატვირთულ ვიდეოებს შორის ყველაზე მეტი ნახვა დააგროვა.

საბავშვო სიმღერამ გააუმჯობესა პუერტორიკოელი ლუის ფონსის პოპსიმღერაზე Despacito გადაღებული ვიდეოკლიპის რეკორდი, რომელიც 2017 წელს გახდა YouTube-ზე ყველაზე პოპულარული ვიდეო.

Baby Shark 2016 წლის ივნისში აიტვირთა ამ პლატფორმაზე და დიახ, მასში გამოყენებულ სიმღერას, რომელის ტექსტიც ძირითადად შედგება "დუ-დუ-დუ-დუ-დუ", უკვე 7,04-მილიარდჯერ მოუსმინეს:

The Guardian-ის ცნობით, ეს მსოფლიოში ცნობილი სიმღერა სამხრეთ კორეულმა კომპანია Pinkfong-მა ჩაწერა და მისი ავტორი უცნობია. თუმცა ვიცით, რომ სიმღერამ საყოველთაო აღიარება მას შემდეგ მოიპოვა, რაც ის კორეული წარმოშობის 10 წლის ამერიკელმა მომღერალმა ჰოუპ სეგოანმა შეასრულა.

თავდაპირველად სიმღერა სახმრეთ-აღმოსავლეთ აზიის ქვეყნებში გავრცელდა, შემდეგ კი ევროპისა და ამერიკის კონტინტებიც მოიცვა: თითქმის წუთნახევრიანმა სიმღერამ მუსიკალური ჩარტებიც კი დაიპყრო.

აღსანიშნავია, რომ გასულ თვეში ოკლაჰომას შტატში მდებარე ციხის პატიმრებმა ზედამხედველები სასტიკ მოპყრობაში ადანაშაულებდნენ და ამ საქმეშიც ეს საბავშვო სიმღერა ფიგურირებდა: დასჯის გზით პატიმრებს აიძულებდნენ, ორი საათის განმავლობაში განუწყვეტლივ ესმინათ სწორედ Baby Shark.