ძალადობრივი პოლიტიკური პარტიის, ქართული მარშის ლიდერი და ქართული ოცნების ხელისუფლების ყოფილი მინისტრის მოადგილე, სანდრო ბრეგაძე, აცხადებს რომ აქვს ინფორმაცია არჩევნების შედეგების გაყალბების შესახებ. კერძოდ, მისი მტკიცებით, შესთავაზეს, რომ კონკრეტულ უბანზე ქართული მარშის ხმები ქართული ოცნებისთვის დაეთმოთ, რის სანაცვლოდაც ბარიერის გადასალახად ხმების დამატებას დაჰპირდნენ.

"ეს იყო მასობრივი გაყალბება. ამის თვალნათელი მაგალითი არის ახალციხის საარჩევნო ოლქში, როდესაც ჩვენს წარმომადგენელს, ოლეგ სანდროშვილს 284 ხმა დაუწერეს. მეორე დღეს იგივე ხმები გადაუწერეს პირდაპირ ქართული ოცნების კანდიდატს და შემოგვითვალეს, რომ თქვენ ხმები აღარ გჭირდებათ და ჩვენ გვჭირდება, რომ პირველ ტურში გავიმარჯვოთო. ყველაზე საინტერესო ის არის, რომ არის გარკვეული შემოთვლები, თუ გავჩერდებით არჩევნების გაყალბებაზე, 1%-იან ბარიერს გადაგვალახინებენ. [...]

ერთი რამ იცოდეს ყველამ, ქართულ მარშს კი უძახდნენ სატელიტს, მაგრამ, ის არავის სატელიტი არ ყოფილა და თავის საქმეს ბოლომდე მიიყვანს", — ამბობს ბრეგაძე.

ქართული ოცნების წევრი, გიორგი კახიანი, ბრალდებას აბსურდულს უწოდებს.

"სერიოზულად პასუხის გაცემა ამაზე არც არის საჭირო, რა თქმა უნდა, ეს აბსურდია", — ამბობს კახიანი.

არჩევნებში მონაწილე ოპოზიციური პარტიების უმრავლესობა შედეგებს ლეგიტიმურად არ ცნობს და მანდატებზე უარის თქმას განიხილავს.

გაიგეთ მეტი: