როგორც ცესკოს სხდომაზე განაცხადეს, ისანში კენჭისყრის პროცესი ჩვეულებრივად მიმდინარეობს. ანა მიქელაძის თქმით, საარჩევნო უბანზე იყო ბევრი ამომრჩეველი, თუმცა არ ყოფილა არანაირი შეფერხება და ამ ეტაპზე საარჩევნო პროცესი ჩვეულებრივად მიმდინარეობს.

კორონავირუსის გავრცელების თავიდან ასარიდებლად, მიქელაძე ამომრჩევლებს მოუწოდებს, საარჩევნო უბნის გარეთ თავად უზრუნველყონ დისტანციის დაცვა.

რაც შეეხებათ რიგში მყოფ იმ ადამიანებს, რომლებსაც ხმა ჯერაც არ მიუციათ, ანა მიქელაძის თქმით, ისინი არჩევანის გაკეთებას 8 საათის შემდეგაც შეძლებენ:

"იმ შემთხვევაში, თუკი ამომრჩეველი იმყოფება რიგში 8 საათზე, საარჩევნო უბნების დახურვის შემდეგ კომისიის თავმჯდომარე გამოდის, ის იწერს ბოლო ამომრჩევლის მონაცემებს და ის პირები, რომლებიც დგანან რიგში, მათ 8 საათის შემდეგაც აქვთ არჩევნებში მონაწილეობის შესაძლებლობა. შესაბამისად, აღნიშნული ამომრჩევლები, რომლებიც იქ იქნებიან 8 საათისათვის, ისინი საკუთარ კონსტიტუციურ უფლებას განახორციელებენ".

გლდანისა და სამგორის ინციდენტებზე მიქელაძე აცხადებს, რომ უბნების გარეთ მიმდინარე მოვლენებს შეუძლია საარჩევნო პროცესის დაზიანება, ამიტომ მხარეებს სიმშვიდისა და ეთიკური ნორმების დაცვისკენ მოუწოდებს:

"ჩვენს კომპეტენციას სცდება უბნის გარეთ საკითხის შესწავლა. არსებობს შესაბამისი უწყებები, რომლებიც ამ საკითხზე მოახდენენ რეაგირებას".

ცენტრალური საარჩევნო კომისიის პრესსამსახურის სიტყვებით, მარკირების შემოწმებასთან დაკავშირებით ამ დროისთვის დაწერილია 11 საჩივარი, რომელიც შესულია საოლქო საარჩევნო კომისიებში:

"ძირითადად ეს ეხება მარკირების წესის დარღვევას, კონკრეტულად იმას, რომ არ ხდებოდა ამ 11 შემთხვევაში მარკირების შემოწმება ამომრჩევლებისათვის. საჩივარი არის დაწერილი ამაზე და, რა თქმა უნდა, ადმინისტრაციას ექნება შესაბამისი რეაგირება. მნიშვნელოვანია, აღინიშნოს, რომ ამის შემდეგ მსგავსი ფაქტები ამ კონკრეტულ უბნებზე აღარ დაფიქსირებულა".

მიქელაძის განცხადებით, 3 საათის შემდეგ საოლქო საარჩევნო კომისიებში შესული საჩივრების რაოდენობა გაიზარდა და მათი უმრავლესობა პროცედურულ ხარვეზებს წარმოადგენს:

"მაგალითად, ესაა საკონტროლო ფურცლის არასრულყოფილი ან არასწორი შევსება, რაც დაფიქსირდა გარდაბნის #52-ე საარჩევნო უბანზე, ასევე ნაძალადევის #მე-13 საარჩევნო უბანზე, წყალტუბოს #68-ე უბანზე. გარდა ამისა, საჩივრები არის მარკირების წესების დარღვევასთან დაკავშირებით, ხმის მიცემის პროცედურის დარღვევა იყო რამდენიმე შემთხვევაში და იყო რამდენიმე შემთხვევა, რომელიც უკავშირდებოდა სარეგისტრაციო ჟურნალის წარმოებას. დამატებით უფრო დეტალურ ინფორმაციას საჩივრების შესახებ მოგვიანებით მოგაწოდებთ".