ცენტრალური საარჩევნო კომისიის პრეს-სპიკერმა — ანა მიქელაძემ მედიას 15:00 საათის მდგომარეობით ამომრჩეველთა აქტივობის შესახებ ინფორმაცია გააცნო. ანა მიქელაძის თქმით, ამ დროისთვის ამომრჩეველთა აქტივობა 36.45 % იყო, რაც რაოდენობრივად 1 279 947 ამომრჩეველია.

გარდა ამისა, ანა მიქელაძემ ყურადღება გაამახვილა საოლქო საარჩევნო კომისიებში, 15 საათის მონაცემებით შესული საჩივრების რაოდენობაზე:

„რაც შეეხება ინფორმაციას საჩივრებთან დაკავშირებით, საოლქო საარჩევნო კომისიებში ჯამში შესულია 90 საჩივარი, რომლებიც ძირითადად ეხება პროცედურულ ხარვეზებს. მაგალითად, წილისყრის პროცედურების დარღვევა, საკონტროლო ფურცლის არასწორი შევსება, სარეგისტრაციო ჟურნალის წარმოების წესების დაღვევა და სხვა. თითოეულ საჩივარს შეისწავლიან საოლქო საარჩევნო კომისიები და მოახდენენ შესაბამის რეაგირებას“, — განაცხადა პრეს-სპიკერმა.

ჟურნალისტების კითხვებზე კოვიდინფიცირებულების, იზოლაციასა და ავღანეთში მყოფების ხმის მიცემის მიმდინარეობის შესახებ ანა მიქელაძემ უპასუხა, რომ ხმის მიცემის პროცესი კანონის შესაბამისად მიმდინარეობს:

"დილიდანვე 311 გადასატანი ყუთი გავიდა სპეციალური საარჩევნო უბნებიდან და ხმის მიცემის პროცესი კანონის შესაბამისად მიმდინარეობს. ავღანეთში ერთ საარჩევნო უბანზე უკვე დასრულებულია ხმის მიცემის პროცესი, მეორე საარჩევნო უბანზე მიმდინარეობს და 8 საათის შემდეგ, საარჩევნო უბნების დახურვის შემდეგ, იქაც დაიწყება ხმების დათვლის პროცესი".

ცესკოს პრეს-სპიკერს ჟურნალისტებმა დაუსვეს კითხვა ქართული ოცნებისთვის ხმის მიცემის სანაცვლოდ, მოქალაქეების მხრიდან 50 ლარის აღების შესახებაც. ჟურნალისტთა თქმით, აღნიშნულს მოქალაქეები კონფიდენციალურად ადასტურებენ.

"ჩვენ ამასთან დაკავშირებით არ ვფლობთ ინფორმაციას. რა თქმა უნდა, თუკი მსგავსი შემთხვევები არსებობს, ამას სჭირდება შესაბამისი ფაქტებით დადასტურება. საარჩევნო ადმინისტრაციის კომპეტენციას სცდება არსებული, ჩვენი უფლებამოსილება არ არის, თუმცა თუ მსგავსი ფაქტები ხდება, რა თქმა უნდა, ვიმედოვნებთ რომ შესაძლებელი იქნება შესაბამისი ფაქტების შესწავლა და რეაგირების მოხდენა. საარჩევნო უბნებზე მსგავსი ფაქტები არ დაფიქსირებულა".

ჟურნალისტების კითხვაზე, ზუსტად იცის თუ არა ცესკოს პრეს-სპიკერმა, რომ ასეთი რამ არ მომხდარა ანა მიქელაძე პასუხობს: "ჩვენ რასაც ვფლობთ ინფორმაციას, კენჭისყრის შენობაში, საარჩევნო უბანზე, სადაც მიმდინარეობს კენჭისყრის პროცესი და სადაც ვრცელდება საარჩევნო ადმინისტრაციის უფლებამოსილება, იქ მსგავსი ფაქტები არ ყოფილა".