Mastercard აზიის რეგიონში საპილოტედ ბიომეტრიული ბარათებით გადახდის სისტემა დანერგა, რომელიც ტრანზაქციის დადასტურებისთვის ტერმინალზე თითის ანაბეჭდს იყენებს.

Mastercard ამ მიმართულებით დამატებითი იდენტიფიკაციის კომპანია Idemia-სთან და სინგაპურულ ფინტექ სტარტაპ MatchMove-თან თანამშრომლობს. MatchMove საბანკო მომსახურების ერთ-ერთი პროვაიდერია, რომელიც ცნობილია სახელით F.CODE Easy.

Idemia-ს მიერ შექმნილი უელემენტო ბარათი ენერგიას გადახდის ტერმინალებისგან იღებს, რათა ბარათმა თითის ანაბეჭდის ბიომეტრიული მონაცემების გაგზავნა შეძლოს — აღსანიშნავია, რომ ბიომეტრიული მონაცემები არა ცენტრალურ სერვერებზე, არამედ უშუალოდ ბარათზე ინახება.

MatchMove სინგაპურში საბანკო ოპერირების ლიცენზიის მიღების მსურველებს შორის ერთ-ერთია და იგი საკუთარი ბიომეტრიული ბარათების პირველ პარტიას მიმდინარე წლის ბოლო კვარტალში გამოუშვებს. საპილოტე პროექტის ტესტირებაში მონაწილეობას Mastercard-ის, Idemia-სა და MatchMove-ის თანამშრომლები მიიღებენ.

MatchMove-ის მთავარი კომერციული დირექტორი, ამარ აბროლი აცხადებს, — „F.CODE Easy-ის საშუალებით, ახალი გადახდის სისტემის გამოყენების რამდენიმე სცენარის განვითარებაზე ვმუშაობთ. ეს პროდუქტი როგორც მომხმარებლებისთვის, ისე პროვაიდერებისა და პარტნიორებისთვის უაღრესად სასარგებლო და ღირებული იქნება. ვიმედოვნებთ, რომ თანამშრომლობით შევძლებთ ბაზარზე ახალი ინოვაციური გადაწყვეტების დანერგვას“.