აჭარის მთავრობის თავმჯდომარის, თორნიკე რიჟვაძის განცხადებით, ნაციონალური მოძრაობის მიერ ანგაჟირებული 4-5 "ჟულიკი" მას გადაადგილებას ვერ შეუზღუდავს. ასე გამოეხმაურა რიჟვაძე გუშინ, 28 სექტემბერს აჭარის ერთ-ერთ სოფელში მომხდარ დაპირისპირებას.

"ნაციონალური მოძრაობის ანგაჟირებული 4-5 "ჟულიკი" მე გადაადგილებას ვერ შემიზღუდავს. მე, როგორც, დიდაჭარა, ასევე, მთლიანად მაღალმთიანი აჭარა, ხულო გუშინ მოვიარე. თავიდან დავიწყეთ და ბოლომდე, გოდერძის უღელტეხილზე დავასრულეთ. რაც შეეხება, ზოგადად, ამ პროცესს, ჩვენ მოლოდინი გვქონდა, როცა პოლიტიკურ ძალას არ აქვს პასუხისმგებლობა, არც პოლიტიკური და არც მორალური და, როდესაც იციან, რომ ეს არის წაგებული ბრძოლა, რა თქმა უნდა, ამ გამოხტომებით შეეცდებიან ისინი პოლიტიკური პროცესი, საარჩევნო გარემო დააზიანონ", — განაცხადა აჭარის მთავრობის თავმჯდომარემ TV 25-ის ეთერში.

ადგილობრივი მედიის ინფორმაციით, 28 ოქტომბერს ხულოში ოპოზიციურად განწყობილმა სპორტსმენებმა აჭარის მთავრობის თავმჯდომარე სოფელში არ შეუშვეს და შეძახილებით — "წადი" ტერიტორია დაატოვებინეს.