ეკონომიკის მინისტრმა ნათია თურნავამ განაცხადა, რომ ავიაკომპანია Wizz Air, სავარაუდოდ, გაზაფხულიდან საქართველოში ბაზას აღადგენს.

"საავიაციო კომპანიები საქართველოში ფრენის პერსპექტივებს ოპტიმისტურად აფასებენ, ასევე, ტურიზმის აღდგენის პერსპექტივებს. რა თქმა უნდა, ეს არ მოხდება მყისიერად, მოხდება ეტაპობრივად, მაგრამ ეს უკვე აძლევს საშუალებას მათ, მაგალითად, ვიზეარს, რომ ეტაპობრივად აღადგინოს ბაზა", — განაცხადა ნათია თურნავამ.

თურნავას თქმით, აღნიშნულ ავიაკომპანიას მხოლოდ საქართველოში არ შეუმცირებია ბაზები, პანდემიის გამო, სხვა ბევრ ქვეყანაში მოუწია ფრენებზე უარის თქმამ.

კორონავირუსული პანდეემიის გამო, 18 მარტს Wizz Air-მა საქართველოში ყველა მიმართულებით ფრენები შეაჩერა.

უნგრეთის საგარეო საქმეთა მინისტრმა, პიტერ სიიარტომ განაცხადა, რომ დაბალბიუჯეტურმა უნგრულმა კომპანიამ, Wizz Air-მა ოპერაციები და ფრენები არა მხოლოდ საქართველოში, არამედ მთელს მსოფლიოში შეამცირა. მისი თქმით, უნგრეთის მთავრობა ყოველთვის ხელს უწყობდა კომპანიის ოპერირებას საქართველოში და იმედი გამოთქვა, რომ Wizz Air მალე იპოვიდა თავის ადგილს მსოფლიოში.

"ამ პანდემიის პირობებში ძალიან შემცირდა Wizz Air-ის ფრენები, მაგრამ ეს არ არის მხოლოდ საქართველოზე ან უნგრეთზე გავრცელებული სპეციფიკა. Wizz Air-მა არამხოლოდ საქართველოში, არამედ სხვადასხვა ქვეყანაში შეამცირა ოპერაციები და ფრენები.

უნგრეთის მთავრობა ყოველთვის პოზიტიურად უდგებოდა Wizz Air-ის ქმედებებს საქართველოს ტერიტორიაზე და ხელს უწყობდა მის მუშაობას. მე ძალიან დიდი იმედი მაქვს, უბრალოდ, დროის საკითხია და აუცილებლად Wizz Air იპოვის თავის ადგილს მსოფლიოში", — განაცხადა სიიარტომ. (მთავრობის თარგმანი)

კორონავირუსთან დაკავშირებული უწყებათაშორისი საკოორდინაციო საბჭოს გადაწყვეტილებით, 21 მარტიდან საჰაერო მიმოსვლა სრულად შეწყდა. რამდენიმე თვის განმავლობაში ფრენის უფლება მხოლოდ საქართველოს ავიახაზებს ჰქონდა, რომელიც სპეცრეისებს ასრულებდა.

ჯერჯერობით უცნობია, აღნიშნული დაბალბიუჯეტიანი ავიაკომპანია რა მიმართულებით დაიწყებს ფრენების ეტაპობრივ აღდგენას.

ამავე თემაზე: