ევროპული საქართველოს საარჩევნო შტაბის ხელმძღვანელი, სერგი კაპანაძე, მამუკა მდინარაძის განცხადებას ეხმაურება, რომელმაც განაცხადა, რომ გამოავლინეს ოპოზიციასთან დაკავშირებული 1500-ზე მეტი ყალბი ანგარიში.

კაპანაძის თქმით, მდინარაძის ბრალდებაზე ყველაზე კარგი პასუხი ჰქონდა თვითონ ფეისბუქს, რომელმაც რამდენჯერმე დაბლოკა ქართულ ოცნებასთან დაკავშირებული ათასობით გვერდი, როგორც პრორუსული და ანტიდასავლური პროპაგანდის მატარებელი.

"მდინარაძის ბრალდებაზე ყველაზე კარგი პასუხი ჰქონდა თვითონ ფეისბუქს, რომელმაც რამდენჯერმე დაბლოკა რამდენიმე ასეული ანგარიში, რომელიც დაკავშირებული იყო ქართულ ოცნებასთან, რომელიც ეწეოდა რუსულ და ანტიდასავლურ პროპაგანდას. მათ შორის იყო ცნობილი გვერდები, რომელთაც ასეული ათასი მოწონება ჰქონდათ და რომელბიც აქტიურად ავრცელებდნენ სამთავრობო პროპაგანდას. ისინი უბრალოდ გააქრო ფეისბუქმა.

ეხლა რომ ისინი აბრალებენ ოპოზიციურ პარტიებს რაღაცას, ეს ჩემთვის გასაკვირი არ არის. რაც შეეხება იმას, რომ მან ერთად მოგვიხსენია ნაციონალური მოძრაობა და ჩვენ, პირდაპირ შემიძლია გითხრათ, რომ ევროპულ საქართველოს, გარდა იმისა, რომ უბრალოდ მოიხსენიებს ამ კონტექსტში, არანაირი ყალბი ანგარიში, ან ასეთი ტიპის საინფორმაციო პოლიტიკა, უბრალოდ არ აქვს და ამაშიც ჩანს როგორი მატყუარები არიან.

მესმის, რომ მათი ამოცანაა, ყველა ოპოზიციური პარტია გაასაღოს ნაციონალურ მოძრაობად, მაგრამ საზოგადოებამ ძალიან კარგად იცის, რომ ეს ასე არ არის. ამიტომ, ეს მათი ნარატივი, პროპაგანდა, რომ ყველა ნაცია, უბრალოდ ჩვეულებრივი ტყუილია და არც ერთი ფაქტი, რომელიც მათ მოიყვანეს ევროპულ საქართველოსთან მიმართებაში, არც ერთი კონკრეტული არგუმენტი და ფაქტი არ დასტურდება", — განაცხადა კაპანაძემ.