ევროპული საქართველოს საარჩევნო შტაბის ხელმძღვანელი, სერგი კაპანაძე, ირაკლი კობახიძის განცხადებას ეხმაურება, რომლის მიხედვითაც ევროპულმა საქართელომ წინასაარჩევნო კვლევა IPM-ს დაუკვეთა და ანკეტაშიც ჩაწერეს კითხვა — პროტესტის რა ფორმა იქნება თქვენთვის მისაღები იმ შემთხვევაში, თუ არჩევნების შედეგებმა არ დაგაკმაყოფილათ. კაპანაძის თქმით, კობახიძე იტყუება.

სეერგი კაპანაძე ამბობს, რომ ქართული ოცნება ცდილობს გამოიყენოს ნაცადი ხერხი — დააბრალოს ოპოზიციას შეიარაღებული ამბოხება და ძალადობა. კაპანაძემ აღნიშნა, რომ ოცნების ტყუილები დარჩება ისტორიას, როგორც მაჩვენებელი იმისა, თუ როგრი საბჭოური სტილის მმართველობა სურს ივანიშვილს.

"ბატონო კობახიძე არის მატყუარა, ევროპულ საქართველოს IPM-თან არანაირი კვლევა არ ჰქონია.

ამაზე მეტი კომენტარის გაკეთებას არ ვაპირებთ, რადგან აზრი არ აქვს იმის მტკიცებას, რაც ფიზიკურად ბუნებაში არ მომხდარა. ჩვენი კვლევა, გუშინ რაც იყო, გავასაჯაროვეთ შედეგები და იმ კვლევის მიხედვით, ისევე როგორც სხვა კვლევების მიხედვით, ქართული ოცნება დრამატულად აგებს ამ არჩევნებს და ეხლა, როგორც ჩანს, მოიგონეს, რომ ნაცადი ხერხი გამოიყენონ და დააბრალონ ოპოზიციას რაღაც შეიარაღებული ამბოხება, ძალადობა, სამოქალაქო ომები და რაღაც ბოდვები. არაფერი არ გამოუვათ. არანაირი შეიარაღებული ამბოხება და არანაირი ძალადობა არ იქნება. ძალიან წყნარად, ამ შაბათს ისინი წააგებენ ამ არჩევნებს და მორჩება ეს ისტორია ასე. ტყუილები დარჩება ისტორიას როგორც მორიგი მაჩვენებელი იმისა, თუ როგორი საბჭოური სტილის მართველობა უნდა რომ ჰქონდეს ივანიშვილს", — განაცხადა კაპანაძემ.