ქართული ოცნების საარჩევნო სიის მესამე ნომრის, ირაკლი კობახიძის განცხადებით, 31 ოქტომბერს საქართველოს მოსახლეობა "ლოქდაუნს" გამოუცხადებს ნაციონალურ მოძრაობასა და ევროპულ საქართველოს. ასე გამოეხმაურა ის ევროპული საქართველოს ინფორმაციას იმის შესახებ, რომ 2 ნოემბერს მთავრობა "ლოქდაუნს" გეგმავს.

"ეს არის, რა თქმა უნდა, სპეკულაციები. ამასთან დაკავშირებით არაერთი განცხადება გაკეთდა უმაღლეს დონეზე, მათ შორის, პრემიერმა, მთავრობამ გააკეთეს ეს განცხადებები. მკაიფოდ ითქვა, რომ არავითარი ლოქდაუნი არ იგეგმება", — განაცხადა მან.

სამთავრობო გუნდი საკოორდინაციო საბჭოს სხდომებზე აცხადებს, რომ მასშტაბური ჩაკეტვა ან აკრძალვები აღარ იგეგმება, რადგან ეს ეკონომიკას აზარალებს და წერტილოვანი დარტყმებით შეეცდებიან კორონავირუსის გავრცელების პრევენციას.