ქართული ოცნების ერთ-ერთმა ლიდერმა, თეა წულუკიანმა სოსო ჯაჭვლიანის მიერ პარტიის დატოვებაზე ისაუბრა და აღნიშნა, სამწუხარო იყო, რომ ჯაჭვლიანი საკუთარი წყენის გამოსახატავად იმ ხალხთან მივიდა, რომლებმაც მისივე მონაწილეობით რუსთაველზე აქცია დაარბიეს.

"არ მგონია, რომ ბატონი სოსო ჩემთვის შორეული ადამიანია. ეს ცოტა უფრო პიროვნულ ნოტაზე ვსაუბრობ და არა მხოლოდ პოლიტიკურზე და ძალიან სამწუხარო სანახაობა იყო, როდესაც ის სწორედ იმ ხალხთან მივიდა საკუთარი წყენის გამოსახატავად, რომელმაც მისივე მონაწილეობით რუსთაველზე აქცია ისე დაარბია, რომ სისხლის გუბეები იდგა ჩვენი დედაქალაქის მთავარ გამზირზე. ამ ხალხთან ბატონ სოსოს მოუნდა, რომ თავისი ხვაშიადი გამოეფინა საჯაროდ", — განაცხადა თეა წულუკიანმა.

მკლავჭიდის ეროვნული ფედრაციის პრეზიდენტის, სოსო ჯაჭვლიანის განცხადებით, იგი ქართულ ოცნებას ტოვებს. ამის შესახებ მან მთავარი არხის ეთერში ისაუბრა.

"ახლა, დღეიდან, ამ წუთიდან, ქართული ოცნების წევრი მე არ ვარ. იმ ზონდერ-ბრიგადის წევრი მე ვერასოდეს ვერ ვიქნები. ეს რეჟიმი უნდა წავიდეს. ეს რეჟიმია, აბა რა არის?", — განაცხადა ჯაჭვლიანმა.

მკლავჭიდის ეროვნული ფედერაციის გამგეობის სხდომაზე დაპირისპირება 17 ოქტომბერს მოხდა. ფედერაციის პრეზიდენტის, სოსო ჯაჭვლიანის გადადგომის მოთხოვნით მწვრთნელებისა და სპორტსმენების ნაწილი სხდომაზე შევიდა და მას წყალი და ბოთლები ესროლა.

სექტემბრის დასაწყისში მწვრთნებელმა განაცხადეს, რომ სოსო ჯაჭვლიანს აქამდე პრემიებს უნაწილებდნენ, თუმცა იმის გამო, რომ ახლა ამ თანხას აღარ აძლევენ, ის მათ ჩანაცვლებას აპირებს.

საქართველოს მკლავჭიდის ეროვნული ნაკრების მწვრთნელი, გენადი კვიკვინია ამბობდა, რომ პრემიის ნაწილი, რომელიც სპორტსმენებსა და მწვრთნელებს სახელმწიფოსგან ერიცხებოდათ, ჯაჭვლიანთან "მეგობრულად" მიჰქონდათ. მისივე განცხადებით, თავიდან, როცა ჯაჭვლიანი ფედერაციის პრეზიდენტად დაინიშნა, თავის საქმეს კარგად აკეთებდა, ამიტომ მწვრთნელებმა გადაწყვიტეს, თავიანთი წილი საკუთარი კეთილი ნებით ჯაჭვლიანისთვის გაეყოთ. ბოლო დროს კი, კვიკვინიას თქმით, სოსო ჯაჭვლიანს ფედერაციისთვის არაფერი გაუკეთებია და კორონავირუსის პერიოდშიც არ დაინტერესებულა, რა მდგომარეობა აქვთ სპორტსმენებს.

რამდენიმე დღის წინ კი, სოსო ჯაჭვლიანმა ტელეკომპანია ფორმულას ეთერში ისაუბრა იმაზე, რომ მას პრემიერმინისტრ გიორგი გახარიასა და თბილისის მერ კახა კალაძესთან შეხვედრა სურდა. ჯაჭვლიანის თქმით, მის ცოლს ქუჩაში "ვიღაც ნიღბიანი" დახვდა და დაემუქრა.