მკლავჭიდის ეროვნული ფედრაციის პრეზიდენტის, სოსო ჯაჭვლიანის განცხადებით, ფედერაციის გამგეობის სხდომაზე "გაჩმორების აქტი ჩაატარეს თავიანთი შეხედულებით". საუბარია მკლავჭიდის ფედერაციის გამგეობაში 17 ოქტომბერს მომხდარ დაპირისპირებაზე, სადაც ჯაჭვლიანის გადადგომა მოთხოვეს.

"გაჩმორების აქტი ჩაატარეს თავიანთი შეხედულებით და ჩვენ მერე ჩავატარეთ გამგეობის სხდომა. არანაირი გასასვლელით მე არ გავსულვარ", — განაცხადა ჯაჭვლიანმა მთავარ არხთან.

მკლავჭიდის ეროვნული ფედერაციის გამგეობის სხდომაზე დაპირისპირება 17 ოქტომბერს მოხდა. ფედერაციის პრეზიდენტის, სოსო ჯაჭვლიანის გადადგომის მოთხოვნით მწვრთნელებისა და სპორტსმენების ნაწილი სხდომაზე შევიდა და მას წყალი და ბოთლები ესროლა.

სექტემბრის დასაწყისში მწვრთნებელმა განაცხადეს, რომ სოსო ჯაჭვლიანს აქამდე პრემიებს უნაწილებდნენ, თუმცა იმის გამო, რომ ახლა ამ თანხას აღარ აძლევენ, ის მათ ჩანაცვლებას აპირებს.

საქართველოს მკლავჭიდის ეროვნული ნაკრების მწვრთნელი, გენადი კვიკვინია ამბობდა, რომ პრემიის ნაწილი, რომელიც სპორტსმენებსა და მწვრთნელებს სახელმწიფოსგან ერიცხებოდათ, ჯაჭვლიანთან "მეგობრულად" მიჰქონდათ. მისივე განცხადებით, თავიდან, როცა ჯაჭვლიანი ფედერაციის პრეზიდენტად დაინიშნა, თავის საქმეს კარგად აკეთებდა, ამიტომ მწვრთნელებმა გადაწყვიტეს, თავიანთი წილი საკუთარი კეთილი ნებით ჯაჭვლიანისთვის გაეყოთ. ბოლო დროს კი, კვიკვინიას თქმით, სოსო ჯაჭვლიანს ფედერაციისთვის არაფერი გაუკეთებია და კორონავირუსის პერიოდშიც არ დაინტერესებულა, რა მდგომარეობა აქვთ სპორტსმენებს.