სამართლიანი არჩევნებისა და დემოკრატიის საერთაშორისო საზოგადოების (ISFED) ცნობით, ფეისბუქისა და ინსტაგრამაზე პარტიების და კანდიდატების მიერ გამოქვეყნებული პოლიტიკური რეკლამებისთვის პოლიტიკურმა აქტორებმა 320 ათას აშშ დოლარზე მეტი დახარჯეს.

ორგანიზაციის ინფორმაციით, 2020 წლის 1 სექტემბრიდან 10 ოქტომბრის ჩათვლით ამ პლატფორმებზე პოლიტიკური პარტიებისა და კანდიდატების 4 896 დეკლარირებული რეკლამა განთავსდა. მათგან, 24 არადეკლარირებული რეკლამა ფეისბუქმა პოლიტიკური შინაარსის მქონედ მიიჩნია და პლატფორმებიდან მოხსნა.

"ფეისბუქი თითოეული რეკლამისთვის დახარჯული თანხის ზუსტ ოდენობას ხელმისაწვდომ მონაცემებში არ უთითებს, თუმცა შესაძლებელია თანხის დიაპაზონის ნახვა. აღნიშნული რეკლამების 78%-ზე 100 აშშ დოლარზე ნაკლები დაიხარჯა. საანგარიშო პერიოდში 2 000 აშშ დოლარზე მეტი მხოლოდ 6 რეკლამაზე დახარჯა და ექვსივე რეკლამა გამოქვეყნებული იყო როგორც ფეისბუქზე, ისე ინსტაგრამზე", — ვკითხულობთ დოკუმენტში.

ფოტო: Isfed

ამასთან, ანგარიშის მიხედვით, ფეისბუქზე რეკლამებს პოლიტიკური პარტიებისა და კანდიდატების 177 ოფიციალური გვერდი ათავსებდა. მათ შორის, ყველაზე მეტ გვერდზე პოლიტიკური რეკლამა ქართულმა ოცნებამ განათავსა. მას ორჯერ ჩამორჩება ლელოსთან დაკავშირებული გვერდების რეკლამების რიცხვი.

ფოტო: Isfed

გარდა ამისა, ISFED-ის ინფორმაციით, პარტიები და კანდიდატები შესაბამის შენიშვნაში უმეტესად დაფინანსების წყაროდ პარტიებს ან საარჩევნო კამპანიის სახელწოდებას უთითებენ. განსხვავებული სტრატეგია აქვს ლელოს, რომლის წარმომადგენლების გვერდებზე განთავსებული რეკლამების დეკლარაციებში ხშირად დამფინანსებლად კანდიდატის გვერდის დასახელებაა მითითებული.

26 ოქტომბერს ISFED-მა სოციალური მედიის წინასაარჩევნო მონიტორინგის მეორე შუალედური ანგარიში წარმოადგინა. მონიტორინგის მოიცავდა 2020 წლის 1 სექტემბრიდან 10 ოქტომბრის ჩათვლით პერიოდს, რა დროსაც 900-ზე მეტი ფესბუქ გვერდი და 11 469 პოსტი შეისწავლეს.

ამავე თემაზე: