პოლონეთში აბორტის შეზღუდვის მოწინააღმდეგეებმა ქვეყნის მასშტაბით ეკლესიებში საპროტესტო აქციები მოაწყვეს და ღვთისმსახურება ჩაშალეს. 25 ოქტომბერს, კვირას კორონავირუსთან დაკავშირებული შეზღუდვების მიუხედავად პროტესტში ათასობით ადამიანი ჩაერთო.

ქალაქ პოზნანის ეკლესიაში ათეულობით ქალი აბორტის მხარდამჭერ ლოზუნგებს სკანდირებდა და მათ საკურთხევლის წინ ბანერები ეკავათ. სასულიერო პირები იძულებული გახდნენ ღვთისმსახურება შეეჩერებინათ, რის შემდეგაც პოლიციის მოსვლამდე აქციის მონაწილეები იატაკზე დასხდნენ. ვარშავის ერთ-ერთი ეკლესიის კედლებზე ჩამოკიდეს ბანერები "ჯოჯოხეთი ქალებისთვის" და "შეუზღუდავი აბორტი".

როგორც BBC წერს, მსგავსი აქციები უჩვეულოა პოლონეთისთვის, სადაც კათოლიკურ ეკლესიას დიდი გავლენა აქვს.

პროტესტი მოჰყვა საკონსტიტუციო სასამართლოს გადაწყვეტილებას, რომლის თანახმადაც ნაყოფის განვითარების პათოლოგიების გამო აბორტი არაკონსტიტუციურად ცნეს. ეს კი იმას ნიშნავს, რომ აბორტი დასაშვები იქნება მხოლოდ გაუპატიურების, ინცესტისა და ქალის დედის ჯანმრთელობისთვის საფრთხის შექმნის შემთხვევაში.

კანონის გადახედვისთვის საკონსტიტუციო სასამართლოს ქვეყნის მმართველმა პარტიამ მიმართა. პოლონეთში ევროპის სხვა ქვეყნებთან შედარებით აბორტი ისედაც მკაცრად იყო შეზღუდული, რის გამოც წელიწადში 100 ათასი ქალი ორსულობის შესაწყვეტად საზღვარგარეთ მიემგზავრებოდა.