სტრატეგია აღმაშენებლის ლიდერის, გიორგი ვაშაძის განცხადებით, არჩევნებამდე ცოტა დრო დარჩა და ბევრი რაიონი, რომლის მოსახლეობასაც მასთან შეხვედრა სურს. სწორედ ამიტომ, 27-საათიან უწყვეტ ტურნეს ბათუმიდან იწყებს.

"არჩევნებამდე ძალიან ცოტა დრო დარჩა და ძალიან ბევრ რაიონს უნდა, რომ ჩავიდე, ვისაუბროთ, დავგეგმოთ, შევხდეთ მოსახლეობას და კიდევ ძალიან ბევრი გვაქვს მოსასწრები, ამიტომ გადავწყვიტე, რომ 27-საათიანი უწყვეტი ტურნე დავიწყო ამ საარჩევნო კამპანიის პროცესში. ამ 27 საათის განმავლობაში შევხდებით ძალიან ბევრ მხარდამჭერს, მოქალაქეს, ძალიან ბევრ ადამიანს, ვისაც ჩვენთან შეხვედრა უნდა და გავესაუბრებით ჩვენს მოხალისეებს. ბევრი დასვამთ კითხვას რატომ 27 საათი და არა 24 საათი?! - იმიტომ, რომ 27 სტრატეგია აღმაშენებლის საარჩევნო ნომერია ანუ ყველამ უნდა შემოვხაზოთ 27 ნომერი, იმისათვის, რომ დავიწყოთ აღმშენებლობა და დავამარცხოთ სიღარიბე", — აცხადებს ის.

ვაშაძის თქმით, 27 საათის განმავლობაში მაქსიმალურად ბევრ ადამიანს შეხვდება და მათ საარჩევნო პროგრამას გააცნობს.

"ამ 27 საათის განმავლობაში შევეცდები, რომ მაქსიმალურად ბევრ რაიონში ჩავიდე, ბევრი ადამიანი ვნახო, რაც შეიძლება ბევრ ადამიანს ავუხსნა და განვუმარტო ჩვენი პროგრამა და ვუთხრა, რომ საქართველოს აქვს ძალიან დიდი პერსპექტივა და ეს პერსპექტივა აღმშენებლობის გზაზე გადის. პირველივე დღიდან, როცა ჩვენი პოლიტიკური პლატფორმა დავაფუძნეთ, ჩვენი მთავარი მიზანი იყო საქმის გარშემო გაგვეერთიანებინა რაც შეიძლება მეტი ადამიანი; უარი გვეთქვა დაპირისპირებაზე და მაქსიმალური კონსოლიდაცია საქმეზე გაგვეკეთებინა. აი ეს არის სწორედ სტრატეგია აღმაშენებლის შინაარსი, გვაქვს ბევრი პროექტი და გეგმა, მაგრამ რაც მთავარია, გვაქვს უშრეტი ენერგია, რომ დღე და ღამე ვიმუშაოთ იმისათვის, რომ ქვეყანა წინ წავიყვანოთ. ამ უშრეტ ენერგიას შემდეგი 27 საათის განმავლობაში გაჩვენებთ, ყოველ საათში ერთხელ ფეისბუქ ლაივის საშუალებით ნახავთ რა აქტივობა გვაქვს, მთელი საქართველო უნდა მოვიაროთ. 27 ნომერი 27 საათის განმავლობაში ტურნეს ვიწყებთ ბათუმიდან და მაქსიმალურად შევეცდებით მთელი საქართველო მოვიცვათ", — აღნიშნა ვაშაძემ.

პარტიის პრემიერობის კანდიდატის თქმით, სტრატეგია აღმაშენებელი გამარჯვების გზაზე მიდის

"სტრატეგია აღმაშენებელი გამარჯვების გზაზე მიდის და მე მაქვს თქვენი მხარდაჭერის იმედი. ბათუმიდან მივდივართ ოზურგეთში, სადაც შევხდებით ჩვენს მოხალისეებს და მოსახლეობას გავესაუბრებით. 15:00 საათზე კი ქუთაისში დიდი ღონისძიება გვექნება. დროა, ვაჩვენოთ ჩვენი ენერგია, თუ რა შეგვიძლია ჩვენი ქვეყნისთვის და სწორედ ამ ენერგიით გვინდა, რომ საბოლოო ჯამში გავიმარჯვოთ", — განაცხადა გიორგი ვაშაძემ.