პარტია მოქალაქეების ლიდერი, ალეკო ელისაშვილი შინაგან საქმეთა მინისტრის, ვახტანგ გომელაურის გადადგომას ითხოვს. მისი თქმით, გუშინ ზუგდიდში მომხდარი თავდასხმის დროს ჩატარებული სპეცოპერაციის შემდეგ, მას თავად უნდა ჰყოფნოდა "შეგნება, მორალი და ნამუსი", რომ გადამდგარიყო.

"ასევე, დღევანდელი ამაზრზენი განცხადების შემდეგ, როცა თქვა, რომ თანხა საქართველოს ბანკის იყო, ბიუჯეტის კი არაო. თითქოს მთავარი, რაც გვადარდებდა ის იყო, რა თანხა მისცეს. რა საქართველოს ბანკის ფული, ხალხის ფული არ არის?", — განაცხადა ელისაშვილმა ტელეკომომპანია ფორმულას ეთერში.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: