ევროპული საქართველოს ზუგდიდის მაჟორიტარობის კანდიდატი, გიგი უგულავა ირაკლი შიხიაშვილის განცხადებას ეხმაურება, რომელსაც მისი ნახვა და საუბარი სურდა.

"ძალიან სასაცილო პერსონაჟად ჩამოყალიბდა შიხიაშვილი, 7 წლის წინაც იგივე უნდოდა, დამელაპარაკოსო, რაზეც მე მაშინაც და ეხლაც შემიძლია ვუთხრა, საკუთარი ტოლი ნახოს და იმას ელაპარაკოს, მე მაგ ხალხთან საქმე არ მაქვს", — განაცხადა გიგი უგულავამ.

უგულავას თქმით, ქართული მარში არის პროპუტინური ორგანიზაცია, მსახური იმ ადამიანის, ვინც კლავს ქართველებს და ოკუპირებული აქვს ჩვენი ქვეყნის ტერიტორიები.

"ეს არის პუტინის რუსეთის დამქაში ხალხი, ესენი არიან ივანიშვილის, სუს-სა და პირადად შიხიაშვილი კიდევ ღარიბაშვილის მლიქვნელი კაცი. ეგენი არიან ჰერპესი ჩვენი ქვეყნის სხეულზე, რადგან ემსახურებიან უცხო ქვეყანას", — აღნიშნა გიგი უგულავამ.

მისი თქმით, განსხვავებული აზრი ყველასი მისაღებია. რაც არ უნდა მიუღებელი იყოს, მას არსებობის უფლება აქვს, მაგრამ ქართული მარშის წევრები არიან პირდაპირ მონები და ეშმაკის მსახურები.

ჰომოფობიური, ქსენოფობიური, პრორუსული, ძალადობრივი ქართული მარშის ერთ-ერთი ლიდერი, ირაკლი შიხიაშვილი ევროპული საქართველოს ოფისში მივიდა, ბათუ შელიას ელაპარაკა და გიგი უგულავასთან შეხვედრა მოითხოვა.

შიხიაშვილი ამბობდა, რომ გუშინ ევროპული საქართველო თავს დაესხა ქართული მარშის ზუგდიდის მაჟორიტარობის კანდიდატს, გიორგი გაბედავას და ცუდი საქციელი იყო მაჟორიტარობის კანდიდატზე ხელის დარტყმა და თავდასხმა. ამაზე კი შელიამ უპასუხა, რომ ეს არ იყო ხელის დარტყმა, ეს იყო ურთიერთშელაპარაკების ნიადაგზე მომხდარი ინციდენტი.

შიხიაშვილი აპირებს, რომ უგულავა მთელი ქალაქის მასშტაბით მოძებნოს და იპოვოს. მისი განცხადებით, გიგი უგულავას ნახვა, უბრალოდ, სალაპარაკოდ უნდა.

ევროპული საქართველოს ინფორმაციით, ზუგდიდში იმყოფება ქართული მარშის ლიდერი, სანდრო ბრეგაძეც. მათივე ცნობით, პოლიციას სიტუაციის შესახებ შეატყობინეს.

On.ge შინაგან საქმეთა სამინისტროს დაუკავშირდა, პასუხი ამ დრომდე არ მიგვიღია.